सोच परिवर्तन, लैङ्गिक हिंसाको अन्त्य : आशा लामा

4 वर्ष पहिले प्रकाशित

(2078-08-12 B.S.)

2750 पटक देखिएको

ममता शर्मा

गौशाला नगरपालिकाका उपप्रमुख आशा लामाले समाजमा सोच परिवर्तन भएमा मात्र महिला हिँसामा अन्त्य हुने बताउनु भएको छ । आइतवार लैङ्गिक हिंसा विरुद्धको १६ दिने अभियान कार्यक्रममा बोल्दै उहाँले यस्तो बताउनु भएको हो । उहाँले भन्नुभयो ,"हाम्रो समाजमा देखीएका विकृति तथा कुरीतिहरुको अन्त्य भएमा महिला हिँसाको अन्त्य हुन्छ । जसको लागि मानिसले आफ्नो सोचाइलाइ परिवर्तन गर्नुपर्दछ । महिला पुरुष प्रतिको समान दृष्टिकोणले मात्र लैङ्गिक हिंसाको अन्त्य हुने मुल्यांकन गर्न सकिन्छ । हरेक क्षेत्रमा महिला सहभागिता पनि उत्तिकै जरुरि छ । जसलाई हामीले आफ्नो घरबाटै सुरुवात गर्नुपर्छ । पहिला आफु सजग भए मात्र अरुमा कुनै पनि कुरा लागु गर्न सकिन्छ ।"

उहाँले अभिभावकहरुलाइ आफ्ना छोराछोरीप्रति ध्यान राख्न आग्रह गर्दै विद्यार्थीहरुलाई कुनै पनि कार्य आफूखुसी गरि भविष्यप्रति लापरवाही नगर्न समेत सुझाउनु भएको छ ।

गौशाला नगरपालिका वडा न.८ बेल्गाछी कृषि ज्ञान केन्द्र स्थित नगरपालिका द्वारा आयोजित लैङ्गिक हिंसा विरुद्धको १६ दिने अभियान कार्यक्रममा वडा न.८ का वडा अध्यक्ष तथा नगरका प्रवक्ता भोजबहादुर दर्लामी ,नगरपालिकाका उपप्रमुख आशा लामा,वडा सदस्य श्याम ,विनोद महतो ,राजनीतिकर्मी काशी महतो ,प्रहरी निरीक्षक विष्णु प्रदिप बस्याल ,सामाजिक सुरक्षा अभियानका प्रमुख अस्मिता शर्मा ,लगायत विभिन्न महिला ,विद्यार्थी ,स्वयमसेविकाहरुको सहभागिता रहेको थियो ।