गौशालामा रहेको वि.के. हेल्थ केयरको लापरवाही ,सम्बन्धित निकाय मौन

4 वर्ष पहिले प्रकाशित

(2078-08-20 B.S.)

5623 पटक देखिएको

निरन्जन कुमार साह

महोत्तरीको गौशाला नगरपालिका स्थित रहेको वि.के हेल्थ केयर हस्पिटल प्रा.लि. ले लापरवाही गरेको पाइएको छ । गौशाला नगरपालिकाको नगर कार्यपालिकाको करिब सय मिटरको दुरीमा रहेको वि.के हेल्थ केयर हस्पिटल प्रा.लि. ले पैसा कमाउने लोभमा गर्न नहुने कार्य गरेको पाइएको छ । सामाजिक संजाल द्वारा आफ्नो विज्ञापनमा प्रचार प्रसार गर्दै २४ औ घण्टा अपरेसन सहितको प्रसुती सेवा र पाठेघरको जटिल शल्यक्रिया सेवा जस्ता कार्य गर्ने गरेको उल्लेख गरिएको छ । विगत केहि दिनदेखि पेट चिरेर बच्चा निकाल्ने काम अर्थात शल्यक्रिया द्वारा बच्चा निकाल्ने काम हस्पिटलले गरेको छ । जबकी शल्यक्रिया गर्नको लागि :

कम्तिमा १५-२५ शैयाको हस्पिटल हुनुपर्ने ,
शल्यक्रिया प्रदान गर्ने कक्षमा प्रति शैया कम्तिमा एकजना शल्य चिकित्सक ,एकजना एनेस्थेटिक्स ,एकजना इन्चार्ज ,एकजना शल्यक्रिया सहायक र एकजना नर्स हुनुपर्ने,
आइसीयु ,एनआइसीयु ,सिसियु आदिमा प्रति शैयामा एकजना स्टाफ नर्स व्यवस्था हुनु पर्ने,
प्रसुती कक्षका लेवर बेडमा Skill Birth Attendants तालिम प्राप्त नर्स हुनुपर्ने ,
ब्लड बैंक हुनुपर्ने ।

लगायत अन्य सेवाहरुको भएको हस्पिटल र मान्यताप्राप्त हस्पिटलले मात्र शल्यक्रिया गर्न पाउने व्यवस्था रहेको छ । तर वि.के.हेल्थ केयरमा शल्यक्रिया गर्ने सुबिधा नरहेको र नगरपालिकाको अनुमतिबिना नै अपरेसन जस्ता जटिल कार्य गरिरहेका छन् ।केहि दिन अघि ४ अपरेसन सफलतापुर्वक गरेको वि.के हेल्थ केयरको सामाजिक संजालमा उल्लेख रहेको छ । हस्पिटलका संचालक विरेन्द्र कुमार महतोका अनुसार गौशाला नगरपालिकाको कार्यालयमा अनुमतिको लागि माग गरे पनि सुनुवाई नभए पछी आफ्नै स्वेच्छाले अपरेसन कार्य संचालन गरिएको उनले बताएका छन् ।

गौशाला नगरपालिकाका जनस्वास्थ्य निरीक्षक मनोज कुमार सिंहका अनुसार गौशाला नगरपालिकामा कार्य विधि बन्ने क्रममा रहेको छ । जसले गर्दा इजाजत दिन नसकेको उनले बताए । बिना अनुमति यस्तो जटिल कार्य गरि जीवनसंग खेलवाड गर्ने अधिकार कसले दियो भन्ने सन्दर्भमा छिटै नै कारवाहीको प्रक्रिया अगाडी बढाइने उनले बताए । नगरपालिका अन्तर्गत रहेको क्लिनिक ,हस्पिटललाइ नीतिनियम अनुसार संचालन गर्न लगाउने प्रतिबद्धता व्यक्त गरेका छन् ।