मेयर गोल्ड कप २०७८ को बिजेता भए प्रतिभा युवा क्लब

5 वर्ष पहिले प्रकाशित

(2078-09-02 B.S.)

3485 पटक देखिएको

ममता शर्मा

महोत्तरीको गौशालामा नगरपालिका द्वारा आयोजित मेयर गोल्ड कप २०७८ प्रतियोगिताको प्रथम बिजेता सिरहा गोलबजारको प्रतिभा यूवा क्लब भएका छन् ।

त्यस्तै उप बिजेता जे .एफ .सि. नवलपरासी भएका छन् । गौशाला नगरपालिका वडा न.८ वेलगाछी ढल्केवर स्थित रहेको खेलमैदानमा मेयर गोल्ड कप २०७८ को अन्तिम दिनको प्रतियोगिता सम्पन्न भएको छ । प्रतिभा युवा क्लब टिमले नवलपरासी टिमलाई ० का विरुद्ध १ गोलले पराजित गरेको छ ।

पूर्व शिक्षा विज्ञान तथा प्रविधि मन्त्रि गिरीराजमणि पोखरेलको हातबाट प्रथम विजेता प्रतिभा युवा क्लबले रकम २ लाख बापतको चेक ,शिल्ड र प्रमाण पत्र प्राप्त गरेका छन् भने उपविजेता जे .एफ .सि. नवलपरासी टिमले रु.१ लाख बापतको चेक ,शिल्ड र प्रमाण पत्र प्राप्त गरेका छन् ।

कार्यक्रममा आफ्ना मन्तव्य दिदै मन्त्रि पोखरेलले खेलले समाजमा छुट्टै विशेषता कायम गरेको भन्दै खेलकुद सबै विद्यालयले संचालन गर्नुपर्नेमा जोड दिनु भएको छ । उहाँले देशलाइ खेलले एउटा पहिचान सिर्जना गर्नमा मद्दत पुर्याएको बताउनु भएको छ ।

गौशाला नगरपालिकाका नगर प्रमुख शिवनाथ महतोले अध्यक्षता गरेका मेयर गोल्ड कप २०७८ समापन कार्यक्रममा प्रमुख अतिथि पूर्व शिक्षा विज्ञान तथा प्रविधि मन्त्रि गिरीराजमणि पोखरेल ,उपप्रमुख आशा लामा ,इलाका प्रहरी कार्यालय गौशालाका प्रहरी निरीक्षक विष्णुप्रदिप बस्याल ,वडा न.८ का वडा अध्यक्ष भोजबहादुर दर्लामी लगायत विभिन्न राजनीतिकर्मी तथा जनसमुदायको सहभागिता रहेको थियो ।