मोरङ्गदेखि बर्दियासम्म लोकमार्ग बन्द

4 वर्ष पहिले प्रकाशित

(2078-10-20 B.S.)

4095 पटक देखिएको

माघ २०, गते

डा. सीके राउत नेतृत्वको जनमत पार्टीको अगुवाईमा किसान आन्दोलन अन्तरगत मोरङ्गदेखि बर्दियासम्म लोकमार्ग बन्द गरी प्रदर्शन भइरहेको छ।जनमतका कार्यकर्ताहरुले विहानैदेखि लोकमार्गमा टेन्ट लगाएर बसेका कार्यकर्ताहरुले लोकमार्ग अवरुद्ध गरेका हुन्।

किसान आन्दोलन झण्डै डेढ महिनादेखि भइरहँदा पनि सरकारले आफूहरुको माग नसुनेको भन्दै किसानहरु लोकमार्ग बन्द गरी प्रदर्शनमा उत्रेका हुन्।पुस ९ गतेदेखि किसानहरुले विभिन्न चरणको विरोधका कार्यक्रमहरु गरिसकेको जनमत पार्टीका नेता बीपी साहले बताएका छन् । तर, हालसम्म सरकारले सुनवाई नगरेकोपछि विहीबारबाट सडकमै बस्ने खाने गरी लोकमार्ग अवरुद्ध गरेर प्रदर्शन सुरु भएको हो।

नेता साहका अनुसार लोकमार्गमा स्कुल, फलफुलसहित अतिआवश्यक सवारीसाधन बाहेकका सवारीहरु दिउँसोका लागि बन्द गरिएको छ। सरकारले किसानहरुको माग सम्बोधन नगरे आन्दोलन थप शसक्त हुँदै जाने साहले चेतावनी दिएका छन् ।

जनमत पार्टीले किसानलाई समयमा मलखाद उपलब्ध गराउन, उखु किसानको भुक्तानी गराउन, किसान कार्डको व्यवस्था गर्न, किसानलाई पेन्सनको व्यवस्था गर्न, कृषिकलाई निःशुल्क विजुली बिललगायतको माग राख्दै किसान आन्दोलन गर्दै आएका छन् ।

किसान आन्दोलनमा विभिन्न पार्टीको समर्थन रहेको र विभिन्न किसान संगठनहरुको सहभागिता रहेको साहले बताएका छन् । सरकारले माग पुरा नगरेसम्म किसान आन्दोलन जारी रहने समेत उनले बताएका छन् ।