जानकी मन्दिर परिसरमा गाडी पार्किङ

5 वर्ष पहिले प्रकाशित

(2078-11-24 B.S.)

2523 पटक देखिएको

फाल्गुन २४

जानकी मन्दिर परिसरमा मधेश प्रदेशका प्रदेश प्रमुख हरिशंकर मिश्रको गाडीमा टिकटक बनाइएको छ । मन्दिर परिसरमै गाडी लगेपछि प्रदेश प्रमुखको आलोचना भएको हो ।

दुई वर्षदेखि जानकी मन्दिर परिसरमा गाडी पार्किङमा रोक लगाए पनि प्रदेश प्रमुख मिश्र गत शनिबार ज १ झ ४५१ नम्बरको गाडी मन्दिरभित्रै लिएर गएका थिए ।जानकी मन्दिरका छोटे महन्थ रामरोशन दासले अनौपचारिक रुपमा दुई वर्षदेखि कुनै पनि गाडी भित्र ल्याउन बन्द गरिएको भन्दै उनले प्रदेश प्रमुखको गाडी भित्रै आउनु गल्ती कुरा रहेको बताए ।

मन्दिरका महन्थ, नगरपालिकाका प्रमुखसहित सुरक्षा अधिकारीहरूको सहमतिमा दुई वर्षदेखि सवारी पार्किङ गर्न अनौपचारिक रुपमा रोक लगाइएपछि सवारीसाधन बाहिर नै पार्किङ गर्ने गरिएको थियो ।मुख्यमन्त्रीदेखि हरेक सुरक्षा अधिकारीको सवारीसाधन बाहिर नै पार्किङ गरिँदै आएकामा प्रदेश प्रमुखको गाडी मन्दिर प्राङ्गणमै लगिएपछि उनको गाडी प्रयोग गरेर टिकटक पनि बनाइएको छ ।

गाडी पार्किङ गरेर प्रदेश प्रमुख मन्दिर भित्र गएको केहीबेरमै आएका दुई युवकले गाडी प्रयोग गरेर टिकटक बनाएका हुन् । उनीहरूले गाडीमा अडेस लागेर आइसक्रिम खाँदै टिकटक बनाएका हुन् ।यता धनुषाका प्रमुख जिल्ला अधिकारी सुरेन्द्र पौडेलले मन्दिरभित्र प्रदेश प्रमुखको गाडी प्रवेश गराएकोबारे जानकारी नभएको बताए । ‘के भएको रहेछ म बुझ्न लगाउँछु’ उनले भनेका छन् ।