चैत ८

अर्को महिना हुने स्थानीय चुनावले गाउँगाउँतिर रन्को ल्याइसकेपछि काठमाडौंमा शीर्ष नेतृत्वबीच हालै सम्पन्न राष्ट्रियसभा सदस्यको चुनावकै शैलीमा भागबण्डाका कुराहरू हुन थालेका छन् ।

०७४ को निर्वाचनमा विराटनगर र ललितपुर महानगर एक्लै जितेको कांग्रेसले यसचोटि पनि ती ठाउँ नछोड्ने अडान लिएको छ । कांग्रेससँग गठबन्धन गरेका कारण विवादास्पद तवरले जितेको भरतपुर महानगरमाथि माओवादीबाट रेणु दाहालका निम्ति दावी कायम छ भने एकीकृत समाजवादीले ०७४ मा एमालेले जितेका काठमाडौं र पोखरा महानगरमा रुचि देखाइरहेको छ ।

तत्कालिन राजपाका तर्फबाट वीरगञ्जको मेयर जितेका विजय सराबगी गतहप्ता एमाले प्रवेश गरेपछि पाँचदलीय गठबन्धनमा उक्त महानगरमाथि जसपाको जोडदार दावी रहेको छ । नगरपालिकाको हकमा एमालेले जितेका अधिकांश ठाउँमा एकीकृत समाजवादीले दावी गरिरहेको छ भने तिनै ठाउँमा माओवादी र कांग्रेसको पनि जोड छ ।

कम्युनिष्टहरूको परम्परागत भोट भएका धरान, हेटौंडा, बुटवल, तुलसीपुर, भीमदत्तजस्ता नगरपालिकामा गठबन्धनका नाममा कांग्रेसलाई छाडिदिने हो भने वामपन्थी मत एमालेतिर ओइरिन सक्के तर्कसमेत गरिँदै छ ।

त्यसमध्ये धरान उपमहानगर उपचुनावमार्फत कांग्रेसले फुत्काएका कारण यसचोटि फेरि त्यसमा उसको दावी छ ।तर, इतिहासमा पहिलोपटक वामपन्थीबीचको विग्रहका कारण उपचुनावमा कांग्रेसले फाइदा उठाए पनि यसचोटि त्यस्तो सम्भावना नरहेको त्यहाँका नेताहरू बताउँछन् ।

गठबन्धनलाई अप्ठेरो छ, गण्डकीमा । त्यहाँ एमालेलाई ताछ्नका लागि जनमोर्चा र जसपा निर्णायक हुने अवस्था छ । समाजवादी र माओवादीको स्थिति त्यहाँ राम्रो छैन । अहिलेसम्मको हिसाव हेर्दा पाँचदलीय गठबन्धनले एमालेलाई मधेश, कर्णाली र गण्डकीमा आच्छु–आच्छु पार्ने सम्भावना छ ।

तर, लुम्बिनी र गण्डकीमा कांग्रेस र जसपाले जति थेग्छन्, त्यसमा माओवादी र समाजवादीको १५–२० प्रतिशत थपियो भनेमात्रै एमाले अप्ठेरोमा पर्ने हो । उता, ओमनमा केपी ओलीद्वारा राजदूतको कार्यकाल थपाएर यही सरकारद्वारा फर्काइएकी शर्मिला ढकाल पराजुलीलाई कतारका लागि राजदूत बनाउने काममा प्रधानमन्त्री शेरबहादुर देउवादेखि समाजवादीका श्रम मन्त्री किसान श्रेष्ठसम्म लागेका छन् ।

अर्थात्, म्यानपावर व्यवसायमा संलग्न उनी सर्वदलीय राजदूत हुने सम्भावना बढेको छ । यसअघि तत्कालिन उपप्रधानमन्त्री विजय गच्छेदारलाई रिझाएर मस्कट गएकी थिइन् ।