ममता शर्मा

गौशाला , कार्तिक १ गते 

तिहार र छठ पर्व नजिकिएसँगै महोत्तरीको गौशाला बजारमा माटोको भाडाको विक्री बढेको छ । मिथिलाञ्चलमा हर्सोउल्लासकासाथ मनाईने दिपावली र छठ पर्व आउँन अब केहि दिन मात्र बाकी छ । गौशाला बजार स्थित घैला बजारमा अनेक प्रकारका माटोको भाडा , बासको छिट्टी लगायतका तिहार र छठ पर्वमा उपयोग गरिने महत्वपूर्ण सामग्रीहरुको विक्री वितरण बढेको हो ।

 महोत्तरीको मुख्य व्यापारिक केन्द्रको रुपमा रहेको गौशाला बजार लगायत मधेश प्रदेशको आठ ओटै जिल्लामा प्राय साप्ताहको दुइ दिन लाग्ने हाट बजारहरुमा अहिले माटोका भाडाहरुको बिक्रीमा  बृद्धि भएको हो ।

 हाट बजारहरुमा मात्र नभएर माटोको भाडाहरु गाउँ गाउँ टोल टोलमा कुम्हारहरुले बेच्ने गरेका छन् ।

तिहार र छठ पर्वमा बिशेष उपयोग हुने माटोको दियो ,ढाकी ,सुपा ,डलिया, मौनी ,हात्ती ,कोसिया ,कुरवार, सर्वा लगायतका माटाका भाडाको बजारमा माग बढेको गौशालाका विश्वजित पंडितले जानकारी दिए ।वर्षैपिच्छे मनाइने तिहार र वर्षमा दुइ चोटी मनाइने छठ पर्वमा उल्लेखित माटोको भाडाहरु अनिवार्य रुपमा प्रयोग गर्ने परम्परा रहेकोले  अहिले बजारहरुमा माटाका भाडाहरु खरिद तथा विक्री गर्न आउनेहरुको वृद्धि भएको उनले बताए ।

माटोको भाडो चोखो र पवित्र हुन्छ भनि मान्यता दिदै आइरहेको परम्परालाई अहिले पनि मान्दै आइरहेको गौशाला निवासी फुल कुमारी देवीले बताइन । उनले भनिन्, “छठमा तयार गरिएको विभिन्न पाकवानहरु सर्वा , ढकना, कुरवारमा राखी  छिटीमा हालेर छठ घाटमा लगिन्छ । सुपमा पकवानहरु राखी सुर्यलाई अर्घ दिईन्छ ।”

माटोका भाडामा विक्री वितरण बढोत्तरी  भएसंगै कुम्हारहरुलाई माटाका भाडाहरु बनाउन भ्याई नभ्याई छ । गौशाला बजारमा कोशौ टाढा छिमेकी जिल्लाहरुबाट पनि मानिसहरु माटाका भाडाहरु खरिद विक्री गर्न आउने गरेका छन्  । लक्ष्मी पूजाको दिन बालिने माटोको दियो तथा छठमा प्रयोग गरिने विभिन्न माटाको र वासको सामग्री बनाउन गौशालाका कुम्हारहरु अहिले व्यस्त छन् । अन्य समयमा त्यति विक्री नहुने तर तिहार र छठ पर्वमा माटाको भाडाको विक्री अत्यधिक हुने गर्दछ ।

बजारमै बासको सुपा बनाउदै बेचीरहेका गौशाला -७ का  प्रमोद मल्लिक भन्छन , “ सोमवार बजारको दिन भएकोले सुपा बनाउन भ्याई नभ्याई हुन्छ । हामी घरमा पनि बनाएर बजार बेच्न ल्याउछौ र बजारमा पनि बनाउदै बेच्ने गर्दछौ ।” यो पर्वमा सुपा , छिटी बेचेर ५० देखि ६० हजार आम्दानी हुने गरेको उनले बताए ।

त्यस्तै माटाको भाडा बेचिरहेका गौशाला-१ रामनगर निवासी रामश्रेष्ठ पण्डित भन्छन, “यी माटाका भाडाहरु बिशेष गरि यहि पर्वमा बढी विक्री हुन्छ । जसबाट हामीलाई करिब १ लाख सम्म आम्दनी हुने गरेको छ ।”