मधेश प्रदेशमा :२२ करोड रूपैयाँ बढीको अवैध सामान बरामद

3 वर्ष पहिले प्रकाशित

(2079-08-21 B.S.)

4576 पटक देखिएको

जनकपुर,२१ मंसिर ।
४ महिनाको अवधिमा मधेश प्रदेशमा सशस्त्र प्रहरीको टोलीले करिब २२ करोड रुपैयाँ भन्दा बढीको अवैध सामान बरामद गरेको छ ।सशस्त्र प्रहरी गस्ती टोलीले मधेश प्रदेशका ८ वटै जिल्लाबाट करोडौं रुपैयाको अवैध सामान बरामद गरेको हो । यही आर्थिक वर्षको साउनदेखि हालसम्म २२ करोड ६ लाख ८ हजार रुपैयाँ बराबरको सामान बरामद गरेको हो । भारतबाट अवैध रूपमा ल्याइएका कपडा, किराना र हार्डवेयर लगायतका सामान बरामद गरी भन्सार कार्यालयमा बुझाइएको सशस्त्र प्रहरीले जनाएको छ ।
त्यस्तै ५१ लाख ८५ हजार रुपैयाँ स्रोत नखुलेको नेपाली रुपैयाँ पनि बरामद गरिएको छ । यहि अवधिमा ४० लाख १५ हजार रुपैया बराबरको अवैध काठ र ३६ लाख ५३ हजार रुपैयाँ बराबरको चौपाया समातेर बुझाइएको छ । यसैगरी २० लाख ७२ हजार रुपैयाँ बराबरको अबैध सुनचाँदी बरामद भएको सशस्त्र प्रहरीले जनाएको छ । तस्करी लगायत विभिन्न गैरकानूनी काममा लागेका ७८ जनालाई पक्राउ गरि कानूनी कारबाहीको दायरामा ल्याएको सशस्त्र प्रहरी, छिनमस्ता बाहिनी बर्दिबासले जनाएको छ ।
यस्तै २८ हजार ४१ थान विभिन्न प्रकारका लागूऔषध, १५ क्विन्टल २८ किलोग्राम गाँजा, २० किलोग्राम चरेस र ५ ग्राम खैरो हेरोइन पनि बरामद गरेको सशस्त्र प्रहरीले जनाएको छ । ४ थान अवैध हतियार र ९ थान गोली सशस्त्र प्रहरीले बरामद गरेको छ । मधेश प्रदेशको ८ जिल्लाको विभिन्न नाकामा फसेका २१ जना महिलाको उद्धार समेत गरिएको छ ।