गौशालामा शीतलहरको कारण व्यापारीहरु आगो ताप्दै

3 वर्ष पहिले प्रकाशित

(2079-09-08 B.S.)

2708 पटक देखिएको

महोत्तरी, ८ गते ।
बाक्लो हुस्सु र शीतलहरीका कारण महोत्तरीको गौशालालगायत तराई मधेसको जनजीवन जाडोको कारण कष्टकर बनेको छ । आज शुक्रबार बिहानैदेखि गौशालामा बाक्लो हुस्सु लागेको छ । बाक्लो हुस्सु र शीतलहरसँगै चलेको चिसो हावाका कारण सर्वसाधारणले कठ्याङ्ग्रिदो चिसो महसुस गरिरहेका छन् ।
मङ्सिर अन्तिम सातादेखि महोत्तरी लगायत विभिन्न क्षेत्रमा बाक्लो हुस्सु र शीतलहर चल्न थालेको हो । एक साता अघिसम्म बिहान बाक्लो कुहिरो लागे पनि दिउँसो पारिलो घाम लाग्न थालेको थियो तर, बिहीबारदेखि बाक्लो हुस्सु लाग्न थालेको छ ।
कठ्याङ्ग्रिदो चिसोले पराल ओछ्याएर सुत्न बाध्य मुसहर, चमार, डोम, हलखोर, पासमानलगायत दलित तथा अतिविपन्न परिवार चिसोबाट बढी प्रभावित भएका छन् । विपन्न परिवार अहिले परालको भरमा रात बिताउन थालेका छन् । परालको आगो ताप्ने र परालकै ओछ्यान बनाएर रात बित्ने गरेको महोत्तरीको गौशाला नगरपालिका ९ का दुखि सदाले बताए ।
गौशाला नगरपालिका ९ भरतपुरकी तेतरी सदा मुसहरले जाडोका कारण दैनिकी कष्टकर बनेको बताइन । “बिहानैदेखि घर बाहिर निस्कन मुश्किल भएको छ, दैनिक गरिने कामकाजमा बाधा पुगेको छ”, ।
विशेष गरी बालबालिका, ज्येष्ठ नागरिक, सुत्केरी र गर्भवती शीतलहरबाट प्रभावित छन् । अत्यधिक चिसोका कारण पशुचौपायालाई समेत समस्या भएको छ । चिसोले गाई, भैँसी, बाख्रालगायत घरपालुवा जनावर मर्न थालेको बताइएको छ । चिसोबाट जोगाउन पशुचौपायाका लागि गोठमै आगो बाल्ने तथा बोरा ओढाउने गरिएको छ ।
त्यसैगरि चिसोको कारण गौशालाका व्यापारीहरुको जनजीवन पनि कष्टकर बनेको देखिन्छ।

जाडो बढेसँगै व्यापारहरू घाटामा गईरहेको गौशालाका एक व्यापारीले बताए। बाक्लो हुस्सुको कारण बजारमा किनमेल गर्न मान्छे पनि आउदैन त्यसै कारण व्यापार घाटामा गईरहेको गौशालाका व्यापारीहरुले बताए ।
गरिव ,दलित तथा अतिविपन्न परिवारहरुले नगरपालिकाले कहिले दौरा र बाक्लो लुगा वितरण गर्छन, भने आसमा बसिरहेका छन ।