गौशाला नगरपालिकामा हात्तीपाइले रोग निवारण सम्बन्धि कार्यक्रम सम्पन्न

3 वर्ष पहिले प्रकाशित

(2079-11-09 B.S.)

3249 पटक देखिएको

ममता शर्मा

महोत्तरी , फाल्गुन ९ गते

महोत्तरीको गौशालामा हात्तीपाइले रोग निवारण सम्बन्धि पालिकास्तरिय योजना तथा बहुनिकाय गोष्ठी कार्यक्रम सम्पन्न भएको छ । गौशाला नगरपालिकाको आयोजनामा नगरपालिकाको हलमा सम्पन्न हात्तीपाइलेरोग विरुद्धको औषधि सेवन अभियान कार्यक्रममा नगरप्रमुख डा. दिपेन्द्र महतो , उपप्रमुख रेणु कुमारी महतो , जिल्ला स्वास्थ्य शाखा अधिकृत हरिनन्दन महतो लगायत नगरपालिकाको स्वास्थ्य शाखा प्रमुख ,१२ वटै वडाका वडा अध्यक्षहरुको सहभागिता रहेको थियो ।

कार्यक्रममा वक्ताहरुले हात्तीपाइले रोग सम्बन्धी जानकारी गराउदै यसबाट कसरी बच्ने सम्बन्धी जानकारी दिए । यहि फागुन ११ गते देखि दुइ साता सम्म संचालन हुन गईरहेको औषधि सेवन अभियानमा सबैको सहभागिता आवश्यक रहेको जानकारी दिए ।

मधेश प्रदेशको ५ जिल्ला महोत्तरी , धनुषा ,सर्लाही ,बारा ,रौतहटमा यो अभियानमा २ वर्ष भन्दा माथिको व्यक्तिहरुले औषधि सेवन गर्नु आवश्यक रहेको जनाइएको छ ।

यो रोग लागेपछी हात्ती जस्तो खुट्टा हुनेभएकोले यो रोगलाई हात्तीपाइले रोग भनिएको हो । यो अभियानको मुख्य लक्ष्य ‘औषधि सेवन कार्यक्रममा कोहि पनि छुट्न नहुने , सबैजना यो अभियानमा सहभागी भइ अशक्त अपाङ्ग र कुरुप गराउने दीर्घ रोगबाट आफू पनि बचौ र अरुलाइ पनि बचाऔ’ रहेको छ ।