अत्यधिक गर्मी बढेको कारण महोत्तरीमा जनजीवन प्रभावित

2 वर्ष पहिले प्रकाशित

(2080-02-20 B.S.)

4192 पटक देखिएको

मनिषा शर्मा

महोत्तरी , जेष्ठ २० गते

महोत्तरीसहित तराई-मधेसमा दैनिक गर्मी बढ्दै गएको कारण जनजीवन प्रभावित बनेको छ । जेठ सकिन लाग्दा पनि पानी पर्न नसक्दा गर्मी अत्यधिक बढ्दै गएको हो । महोत्ततरीको गौशाला नगरपालिका लगायत मधेस क्षेत्रमा जेठ देखि मध्याह्नपख अधिकतम तापक्रम करिब ३७ देखि ४१ डिग्री सेल्सियसको हाराहारीमा पुग्न थालेको छ ।

यस्तो गर्मिको समयमा घर बाहिर निस्किने एकदमै मुस्किल भएको छ ।
सूर्योदय भएसँगै साँझसम्म नै एकनासले टन्टलापुर घाम लाग्दा अत्यधिक गर्मी भई जनजीवन प्रभावित बनेको हो । बेला–बेलामा सामान्य वर्षा भए पनि महोत्तरी लगायत मधेश क्षेत्रमा गर्मी घट्न सकेको छैन । पानी परेर मौसम उघ्रिनासाथ गर्मी बढ्न थालेको छ । चर्को घामका कारण मध्याह्नमा घर बाहिर निस्कनै मुस्किल पर्ने गरेको महोत्तरीको गौशाला नगरपालिकाका स्थानीयले बताएका छन् ।

गर्मीले दिउँसोको समयमा मुख्य बजारका सडक सुनसान हुन थालेका छन् । सरकारी कार्यालयमा सेवाग्राहीको सङ्ख्या घटेको छ । गर्मीका कारण विद्यालय, उद्योग व्यवसाय सबै प्रभावित भएका छन् ।

अत्यधिक गर्मि बढेकै कारण महोत्तरीको गौशाला नगरपलिकामा अवस्थित सामुदायिक विद्यालय बन्द रहेका छन् ।

गर्मीका कारण घाउ, खटिरा, आउँ, टाइफाइड ज्वरो, झाडापखालालगायत सरुवा रोगका बिरामीको चाप पनि स्थानीय अस्पताल तथा स्वास्थ्य संस्थामा बढ्न थालेको चिकित्सक बताउँछन् । गर्मीले विद्यालय जानुपर्ने स–साना बालबालिकासँगै वृद्धवृद्धा, अशक्त, किसान र मजदुर बढी प्रभावित भइरहेका छन् ।