निरन्जन कुमार साह

महोत्तरी , जेष्ठ २६ गते

नेपालभरि सय प्रतिशत विद्युत घरघर पुर्याउने उद्देश्यले गौशालामा नेपाल विद्युत प्राधिकरणको गौशाला वितरण केन्द्रबाट विपन्न घर परिवारलाई विद्युत मिटर वितरण गरिएको छ ।

आज शुक्रबार  महोत्तरीको गौशालामा विद्युत प्राधिकरणको गौशाला वितरण केन्द्र गौशालाद्वारा आयोजना गरिएको चुहावट नियन्त्रण सम्बन्धि अन्तरक्रिया तथा विपन्न परिवारलाई नि:शुल्क मिटर वितरण कार्यक्रममा जिल्लाको गौशाला नगरपालिका , भंगहा नगरपालिका ,सोनमा गाउँपालिका र सम्सी गाउँपालिकाका ४ सय १० घरपरिवारलाइ निशुल्क विद्युत मिटर नेपाल विद्युत प्राधिकरणका कार्यकारी निर्देशक कुलमान घिसिङको हातबाट वितरण गरिएको हो  ।

नेपाल भरि प्रत्येक घरघरमा विद्युत पुर्याउने र कृषि क्षेत्रमा प्रत्येक किसानको खेतखेतमा विद्युतको आपूर्ति गर्ने नेपाल विद्युत प्राधिकरणको मुख्य उदेश्य तथा मुख्य एजेन्डा रहेको निर्देशक घिसिङले कार्यक्रममा आफ्नो मन्तव्यको क्रममा बताउनु भयो । उहाँले भन्नुभयो , ‘पहिला लोडसेडिंग हटाए , त्यसपछि विद्युत चुहावट न्यूनीकरण गरे र विद्युत चुहावट नहोस् भन्ने उद्देश्यका साथ विपन्न परिवारलाई नि:शुल्क विद्युत  मिटर वितरण गरेको छु ।’

'अहिले सम्म नेपालमा ९६ प्रतिशत जनताले विद्युत प्राप्त गरेको छन । छिटै आउने आर्थिक वर्षमा सत प्रतिशत जनताले विद्युत पाउने योजना रहेको र यदि कुनै जनताले विद्युत प्राप्त नगरेको भए नजिकको  विद्युत कार्यालयमा तुरन्त सम्पर्क गर्न पनि उहाँले आग्रह गर्नुभयो ।

जसका लागि स्थानीय र प्रदेश सरकारको पनि दायित्व रहेको उहाँको भनाइ छ । उहाँले यसमा विचौलियासंग सावधान रहन समेत जनतालाई आग्रह गर्नुभएको छ । हाल मधेश प्रदेशमा न्युनतम शुल्क मात्र तिर्ने ग्राहकको संख्या दुइ लाख रहेको समेत निर्देशक घिसिङले बताउनुभयो ।

कार्यक्रममा गौशाला वितरण केन्द्रका प्रमुख प्रविन कुमार मिश्र , नेपाल विधुत प्राधिकरणका कार्यकारी निर्देशक कुलमान घिसिङ , नेपाल विधुत प्राधिकरणका मधेश प्रदेश प्रादेशिक कार्यालय प्रमुख मुनिन्द्र ठाकुर ,गौशाला नगरपालिकाका नगरप्रमुख डा. दिपेन्द्र महतो ,भंगहा नगरपालिकाका नगरप्रमुख संजिव साह ,औरही नगरपालिकाका नगरप्रमुख प्रदिप खड्का , इलाका प्रहरी कार्यालय गौशालाका प्रमुख मनोज यादव लगायत विद्युत प्राधिकरण गौशाला वितरण केन्द्रका सम्पूर्ण कर्मचारीहरुको उपस्थिति रहेको थियो ।