अनुगमनको हल्लाले लगातार ३ दिनदेखि गौशाला बजार बन्द

3 वर्ष पहिले प्रकाशित

(2080-03-24 B.S.)

4660 पटक देखिएको

निरन्जन कुमार साह

महोत्तरी , असार २४ गते

महोत्तरीको गौशाला बजार ३ दिन देखि बन्द अवस्थामा रहेको छ । राजस्व कार्यालयबाट चेकजांच तथा अनुगमन गर्न कर्मचारी आउने भन्ने खबरले गौशाला बजारमा सबै पसलहरु बन्द भएका छन् । बजारमा बिहान केहिबेर पसलहरु खुलेपनि दिउँसोभरि पसल बन्द हुन्छन । स्थायी लेखा नम्बर नलिएका र समयमा कर चुक्ता नगरेकाहरूले पसल बन्द गरेको एक व्यापारीले बताए । उनले यसमा उद्योग वाणिज्य संघको कमीकमजोरी रहेको आरोप लगाएका छन् ।

राजस्व कार्यालयको अनुगमन आउने हल्लाले गौशाला बजार लगातार ३ दिन देखि सुनसान छ । गौशाला बजार महोत्तरी जिल्लाको मुख्य व्यापारी केन्द्रको रुपमा रहेको छ । कोशौ दुरबाट खरिदविक्री गर्ने ग्राहकहरुको यहाँ आगमन हुने गर्दछ तर तिन दिन देखि कोशौ दुरबाट आएका व्यक्तिहरु फर्केर जाने गरेका छन् । करिब १ हजार गाउँको खाधान्न आपूर्ति गर्ने गौशाला बजार ३ दिन देखि बन्द हुँदा करोडौको क्षति भएको छ । कर कार्यालयबाट अनुगमनमा आउने कर्मचारीले पसलको कागजात , मुल्य अभिवृद्धि कर तिरेको नतिरेको चेकजाँच गर्छ भन्ने डरले व्यापारीहरु पसल बन्द गरेर बसेका छन् ।

एक ग्राहकले कर तिर्नु अनिवार्य हो तर गौशाला बजारमा व्यापारीहरु अनुगमनको डरले पसल बन्द गर्नुले कर नतिरेको भन्ने प्रष्ट रुपमा बुझिएको बताए ।

गौशाला बजारमा उद्योग वाणिज्य संघ हुँदाहुदैँ पनि संघ नभएको जस्तो महसूश भएको व्यापारीहरुले आलोचना गरेका छन् । व्यापारीको साझा संस्था उद्योग वाणिज्य संघ भएपनि संघले यसबारेमा कुनै चासो नलिएको र संघका पदाधिकारीहरु आफ्नै तालमा हिडेको उनीहरुले गुनासो गरेका छन् । पदाधिकारीको कार्यकाल सकिएपनि पुरानै पदाधिकारी घिसिपिटी हिनिरहेको उनीहरुको भनाइ छ ।

यता यस सम्बन्धमा उद्योग वाणिज्य संघका अध्यक्ष राजाराम प्रसाद साहले नविकरणको लागि पटक पटक सूचना निकालेपनि कुनै पनि व्यापारीले चासो नलिएको बताए । जसले गर्दा नयाँ पदाधिकारी चयनको परिस्थिति नबनेको उनको भनाइ छ । केहि व्यापारीहरुको कारण गौशाला उद्योग वाणिज्य संघ शक्ति विहिन ,सम्पर्कविहिन , नीतिनियम विहिन बनेकोले गौशाला बजार ३ दिन देखि अनुगमनको डर र त्रासले सुनसान भएको उनले बताए ।