मिथिलामा झिझिया नाचको रौनक

2 वर्ष पहिले प्रकाशित

(2081-06-20 B.S.)

862 पटक देखिएको

ममता शर्मा , महोत्तरी

मिथिलामा दशैँ सुरु भएसँगै झिझिया नाचको रौनक बढेको छ । मिथिलाञ्चलमा गरिने लोक नृत्यहरुमध्ये झिझिया एक विशिष्ट प्रकृतिको नृत्य हो । जुन दशैँको समयमा साझ दुर्गा मन्दिरमा गर्ने गरिन्छ । मिथिलामा आफ्नै महत्व रहेको रहेको झिझिया नाच घटस्थापनादेखि विजया दशमीसम्म गर्ने परम्परा रहेको छ ।

बोक्सीबाट आफ्ना सन्तान र समाजको सुरक्षाका लागि यो नृत्य गर्ने गरिएको जनविश्वास रहेको छ । बलिरहेको दियो तथा असंख्य प्वाल पारिएको घैँटो टाउकामा राखेर नृत्य गर्ने गरिन्छ घैँटो टाउकोमा राखी जादु टुनामुनाबाट मुक्ति पाउनका लागि परम्परागत रुपमै नृत्य गरिने गरिन्छ । नृत्यसँगै गाइने सो गीतमा बोक्सीलाई गाली गरिन्छ भने बोक्सीको अनैतिक शक्तिको प्रभाव सो गालीले कम हुने गरेको तथा सन्ततिको सुरक्षा हुने जनविश्वास रहेको मटिहानी संस्कृत विद्यालयका प्रध्यापक विनय उपाध्यायले जानकारी दिनुभयो ।

झिझिया लोकनृत्य महोत्तरी लगायत धनुषा , सिरहा, सर्लाही, बारा, पर्सा सहितका जिल्लामा गरिने गरिन्छ । त्यस्तै भारतीय मिथिला क्षेत्रमा पनि प्रस्तुत गरिन्छ । झिझिया कुनै जाति विशेषको नभई सम्पूर्ण मैथिली समाजको लोकनृत्य हो, जसमा बलिरहेको दियो भएको असंख्य प्वाल पारिएको घैंटो टाउकोमा राखी नृत्य गर्ने गरिन्छ ।