ममता शर्मा , महोत्तरी

महोत्तरीमा एक्कासी आगो लाग्दा लाखौँको क्षति भएको छ । जिल्लाको गौशाला नगरपालिका वडा नं ६ फुलकाहा स्थित गाउँ भन्दा केहि पर रहेको उखु खेत र परालमा गत आइतबार ७ गते आगलागी भएको हो । आइतबार देखि हिजो अस्तिसम्म पनि एक पछी अर्को व्यक्तिको खेतमा आगलागी भएको स्थानीयको भनाई छ ।

करिब १५-१६ जना किसानको करिब ७ बिघा खेतमा आगलागी हुँदा ३०-३५ लाखको क्षति भएको स्थानीय गौशाला -६ फुलकाहा निवासी विरेन्द्र कुमार साहको भनाई छ। आगो ७ गते आइतबार मेरो उखुको खेतमा करिब ११ बजेतिर लाग्यो उनि भन्छन , “म खेतमै काम गरिरहेको थिए। अचानक खेतमा आगो सल्कियो । वरपरका मान्छेहरुलाई हार गुहार गरे । अनि सबै स्थानीय साथिभाईहरु आएर निभाउने प्रयास गरे । त्यतिन्जेल पुरा खेत जलिसकेको थियो ।४/५ घण्टा सम्म आगो लाग्यो ।बल्ल पछी निभ्यो ।”

विरेन्द्र कुमार साहको खेतमा आगलागी भएको भोलि पल्ट स्थानीय राम छवीलाल यादवको खेतमा राखेको परालको टालमा आगलागी भयो । लगत्तै स्थानीय सरद यादवको खेतमा आगलागी भयो । यस्तै गरेर हिजो अस्तिसम्म एक पछी अर्को गर्दै १५-१६ जना किसानको उखुको खेत र परालमा आगलागी भएको स्थानीय सरद यादवको भनाई छ । अचानक एक पछी अर्को खेतमा दिनहु जसो आगो लाग्न थाल्यो , यादव भन्छन , “ हामीलाई आगो लागेको समयमा जानकारी भएन । कुनै खेतमा दिउसो नै आगो लागेको छ भने कुनै खेतमा रातिको समयमा आगो लाग्यो ।हामीले आगो लाग्दा स्थानीय र रामगोपालपुर नगरपालिकाको र बर्दिबास नगरपालिकाको वारुण यन्त्र बोलाएर आगो नियन्त्रणमा लिइएको थियो ।

आगो लगाएको कोहि कसैले पनि नदेखेकोले कुनै व्यक्तिले आगो लगाएको भन्न नसकिने सरद यादवको भनाई छ । यद्धपि आगलागीबाट किसानको लाखौँको क्षति हुन गएकोले स्थानीय सरकारले सहयोगको पहल गर्नुपर्ने उनको माग छ ।

दैवीय शक्ति बिग्रेर आगो लागेको हुन सक्ने अनुमान

फुलकाहा वासीले करिब ४-५ महिना अगाडी महारानी माईको यज्ञ (विशेष पुजा) गर्ने संकल्प गरेका थिए तर हालसम्म सो हुन सकेको छैन । जसको कारणले दैवीय शक्तिले रिसमा त्यो सव गरेको हुन सक्ने स्थानीय युवा रोहित यादवको भनाई छ । एक्कासी आगो लाग्नु र कसैले लगाएको प्रमाण नहुनुले दैवीय शक्ति बिग्रेर यस्तो भएको हुन सक्ने स्थानीयहरुको भनाई छ ।

पुर्व गृह मन्त्री साहद्वारा अनुगमन

शनिबार मधेश प्रदेश सभा सदस्य तथा पुर्व गृह तथा संचार मन्त्री भरत प्रसाद साह लगायत उनका कार्यकर्ता सहितको टोलीले अनुगमन गरेका छन् । आगलागी भएको स्थान उखु खेतहरुमा पुर्व मन्त्री गएर अनुगमन गरेका छन् भने किसानहरुले आफ्नो समस्या र गुनासो मन्त्री समक्ष व्यक्त गरेका थिए । पुर्व मन्त्री साहले यस्तो किसिमको घटनाले फुलकाहा बासी त्रसित भएकोमा दु:ख व्यक्त गरेका छन् । यस्तो घटना आगामी दिनमा हुन नदिनको लागि स्थानीय सरकारले चासो लिनुपर्ने , प्रहरी प्रशासनले सुरक्षा दिनुपर्ने र किसानहरु आफु पनि सचेत भएर कृषि कर्म गर्नुपर्ने साहले बताए । दैवीय शक्तिकै कारणले यस्तो भएको हो भनेर यकिन भने गर्न नसकिने उनको भनाई छ । साथै साहले आगलागीबाट भएको क्षतिपूर्तिको लागि सम्बन्धि निकाय सँग आफुले पहल गर्ने प्रतिबद्धता व्यक्त गरे ।