राजनीतिक हस्तक्षेपले त्रिविको उपकुलपति नियुक्तिमा विवाद, योग्य उम्मेदवार पन्छाइयो भन्ने आरोप

6 महीना पहिले प्रकाशित

(2082-03-26 B.S.)

876 पटक देखिएको

काठमाडौं, २६ असार — सरकारले शिक्षाको क्षेत्रमा निष्पक्षता र पारदर्शिता कायम राख्ने दाबी गरिरहेकै बेलामा त्रिभुवन विश्वविद्यालयमा गरिएको उपकुलपति नियुक्ति प्रक्रियाले गम्भीर प्रश्न उठाएको छ। प्रधानमन्त्री केपी शर्मा ओली नेतृत्वको सरकारले त्रिविको उपकुलपतिमा आफ्ना राजनीतिक निकटस्थलाई नियुक्त गरेपछि तीव्र आलोचना सुरु भएको छ।

पूर्व प्रधानमन्त्री पुष्पकमल दाहाल ‘प्रचण्ड’ नेतृत्वको सरकारले अघि सारेको खुला प्रतिस्पर्धामार्फत मेरिटका आधारमा योग्य व्यक्तिको छनोट गर्ने प्रणालीलाई बेवास्ता गर्दै हालै गरिएको नियुक्तिमा योग्य र अनुभवी उम्मेदवारहरूलाई पन्छाएर सत्तारूढ दल निकट व्यक्तिलाई अगाडि सारिएको आरोप लागेको छ।

यस निर्णयप्रति माओवादी केन्द्रका केन्द्रीय नेता सूर्यनारायण साहले कडा आपत्ति जनाएका छन्। उनले नियुक्ति प्रक्रियालाई "राजनीतिक स्वार्थ र नातावादको प्रतिफल" भन्दै गम्भीर आलोचना गरेका छन्। “ओली सरकार आफूप्रति समर्पित नदेखिने र आलोचनात्मक सोच राख्ने व्यक्तिहरूलाई बर्खास्त गर्न तत्पर देखिन्छ,” साहले भने।

शैक्षिक वृत्तमै पनि यो नियुक्ति विवादास्पद बन्दै गएको छ। शिक्षाविद्हरूले त्रिविको गरिमा र निष्पक्षतामाथि आँच आएको बताएका छन्। विश्वविद्यालयजस्तो स्वतन्त्र र शैक्षिक संस्थामा राजनीतिक हस्तक्षेप हुनु दुःखद भएको छ।

यस्तै भागबन्डा मा कार्यकाता भर्ना केन्द्र बनेको कारण ले शिक्षामा केहि प्रगति नहुनु र विद्यार्थी बिदेश पलायन भैरहेको छ।