उखुको अनुदान भुक्तानीको माग गर्दै उखु किसानहरु आन्दोलित

8 महीना पहिले प्रकाशित

(2082-05-08 B.S.)

605 पटक देखिएको

महोत्तरी, भदौं ८ गते ।

गत आर्थिक बर्षको उखुको अनुदान भुक्तानीको माग गर्दै उखु किसानहरुले काठमाडौं केन्द्रीत आन्दोलन सुरु गरेका छन् । उखु उत्पादक महासंघ, उखु उत्पादक कृषक समिति लगाएतले गत आर्थिक बर्षको उखुको वक्यौता अनुदान रकम प्रति क्वीन्टल रु ७० का दरले भुक्तानी गर्नुपर्ने भन्दै माइतिघरमा प्रदर्शन गरेका हुन् ।

देशका मेरुदण्ड किसानको पसिनाको मोल तिर्न नसक्ने भ्रष्ट सरकार रहेको र केपी ओली नेतृत्वको गठबन्धन सरकारले वर्षौंदेखि उखु किसानलाई दिने भनिएको अनुदान रकम भुक्तानी नगरी किसानको अधिकार माथि खेलबाड गर्दै आएको प्रदर्शनको एक्यबद्धता जनाउदै माओवादी पार्टीका नेता सुर्यनारायण साहले बताए उनले भने, "किसानलाई न्याय दिनु त परै जाओस्, उल्टै ढिलासुस्ती र बेवास्ता गर्दै किसानलाई सडकमा धकेल्ने काम मात्र भएको छ ।" उखु किसानलाई दिने भनिएको सबै अनुदान रकम अविलम्ब भुक्तानी गर्नुपर्ने उनको भनाइ छ ।

चालु आर्थिक वर्ष २०८२/८३ को बजेटमा उखुको अनुदानका लागि सरकारले आवश्यक बजेट विनियोजन नगरेपछि उखु किसानहरु अघिल्लो आर्थिक बर्षको अनुदान पनि नआउने हो की भन्ने त्रासमा छन् । उनीहरुले गत वर्षकै अनुदानसमेत आधा कटौती गर्न लागेको आंशका गरेका छन् ।

प्रदर्शनमा सहभागीहरुले एकतर्फी मूल्य स्वीकार छैन, उखु कृषक शोषण बन्द गर, उखु अनुदान भुक्तानी गर , मूल्य निर्धारणमा कृषकहरुलाई सहभागी गर लगाएतका प्लेकार्ड प्रदर्शन गरेका छन् । कृषकहरुले सरकारले अनुदान रकम कटौती गरे अव उखु खेती गर्ने अवस्था नआउने जनाएका छन् ।