काठमाडौं, भदौ ३१ ।

स्वतन्त्र नाई संघ (SNS) को आयोजनामा काठमाडौं गौशालास्थित मिथिला थालीमा मंगलबार आयोजित भव्य कार्यक्रममा नाई–ठाकुर समुदायका १०+२ उत्तीर्ण विद्यार्थीलाई विशेष सम्मान गरिएको छ।

संघका केन्द्रीय वरिष्ठ उपाध्यक्ष सन्तोष कुमार ठाकुर सभापतिको भूमिकामा रहनुभएको उक्त कार्यक्रममा प्रमुख अतिथि डा. कमोद ठाकुर निराला, विशिष्ट अतिथि संघका संस्थापक तथा संरक्षक तथा हाल नेपाल वायुसेवा निगममा कार्यरत दिपक जंग ठाकुर, डा. शुभास यादव, महादेव ठाकुर, अक्षयलाल ठाकुरलगायतका प्रतिष्ठित व्यक्तित्वहरूको उपस्थितिले समारोहलाई विशेष बनाएको थियो।

समारोहको प्रारम्भ प्रमुख अतिथि डा. निरालाले दीप प्रज्वलन गरी गर्नुभएको थियो। त्यसपछि विद्यार्थीहरूलाई क्रमशः टीका (अक्षयलाल ठाकुर), रुद्राक्षको माला (महादेव ठाकुर), खादा (सभापति सन्तोष कुमार ठाकुर) तथा प्रमाणपत्र (डा. कमोद ठाकुर निराला र दिपक जंग ठाकुर) द्वारा सम्मान गरिएको थियो।

संपूर्ण विद्यार्थीलाई यसरी सामूहिक सम्मान गरिएको दृश्यले अभिभावक र सहभागीहरूमा गर्व र उत्साह थपिएको थियो।

डा. निरालाले शिक्षालाई जीवन परिवर्तन गर्ने मुख्य आधारका रूपमा प्रस्तुत गर्दै भन्नुभयो, “१०+२ उत्तीर्ण हुनु केवल एउटा प्रमाणपत्र हातमा लिनु मात्र होइन, यो भविष्यको नयाँ ढोका खोल्ने अवसर हो। शिक्षा नै व्यक्तित्व निर्माण गर्ने, सोच बदल्ने र समाजलाई अगाडि बढाउने माध्यम हो।”

उहाँले विद्यार्थीहरूलाई इमानदार, अनुशासित र परिश्रमी बन्न प्रेरित गर्दै, “जहाँ पुगे पनि आफ्नो संस्कार र समुदायप्रतिको जिम्मेवारी नबिर्सनुहोस्” भन्ने सन्देश दिनुभयो।

दिपक जंग ठाकुरको घोषणाः हरेक वर्ष निरन्तरता

विशिष्ट अतिथि दिपक जंग ठाकुरले समुदायलाई शैक्षिक दृष्टिले अघि बढाउन यस्तो कार्यक्रमलाई संस्थागत रूपमा निरन्तरता दिने घोषणा गर्नुभयो। उहाँले भन्नुभयो, “आजको सफलता विद्यार्थीहरूको मात्र होइन, आमा–बुबाको त्याग र शिक्षकहरूको मेहनतको प्रतिफल हो। यसरी समुदायको छोराछोरीलाई सम्मान गर्दा उनीहरूमा अझ आत्मविश्वास र प्रेरणा जागृत हुन्छ। अबदेखि यस्तो सम्मान समारोह हरेक वर्ष निरन्तर आयोजना हुनेछ।”

उहाँले थप भन्नुभयो, “हाम्रो समुदाय अब पछाडि बस्ने समय सकिएको छ। शिक्षा नै वास्तविक क्रान्ति हो, जसले उज्यालो भविष्य सुनिश्चित गर्छ। त्यसैले प्रत्येक परिवारले आफ्नो सन्तानलाई अध्ययनमा प्रोत्साहन गर्नुपर्छ।” सभापति सन्तोष कुमार ठाकुर, महासचिव महादेव ठाकुरलगायत वक्ताहरूले पनि सम्बोधन गर्दै शिक्षा बिना कुनै पनि समाजले दिगो प्रगति गर्न नसक्ने भन्दै विद्यार्थीलाई मेहनत, लगनशीलता र सकारात्मक सोचसहित अघि बढ्न आह्वान गर्नुभयो।समारोहले नाई–ठाकुर समुदायमा शैक्षिक उत्थानप्रति नयाँ ऊर्जा भरेको सहभागीहरूको भनाइ छ।

विद्यार्थीलाई सम्मान गर्दा उनीहरूमा थप प्रोत्साहन हुने र समुदायमा शैक्षिक चेतना फैलिने विश्वास गरिएको छ। यसरी सम्पन्न विद्यार्थी सम्मान समारोहले नाई–ठाकुर समुदायलाई शैक्षिक प्रगतितर्फ दृढतापूर्वक अघि बढाउने नयाँ संकल्प दिएको छ। दिपक जंग ठाकुरको “हरेक वर्ष निरन्तरता” को घोषणा यस कार्यक्रमलाई दीर्घकालीन परम्पराको रूपमा स्थापित गर्ने महत्वपूर्ण कदम भएको सहभागीहरूले बताएका छन्।