भारी वर्षाले नदी किनार र अस्थायी बस्तीहरूमा बाढीको जोखिम उच्च

1 महीना पहिले प्रकाशित

(2082-06-18 B.S.)

215 पटक देखिएको

महोत्तरी, असोज १८ गते ।

अविरल वर्षाका कारण मधेश प्रदेशको धनुषाको कमला नदी, जलाद नदी,महोत्तरीको मरहा नदि, रौतहटको बागमती र लालबकैया नदीहरूमा पानीको सतह तीव्र गतिमा बढेसँगै जिल्लाका नदी किनार र अस्थायी बस्तीहरूमा बाढीको जोखिम उच्च बढेको छ। राष्ट्रिय विपद् जोखिम न्यूनीकरण तथा व्यवस्थापन प्राधिकरणको अति भारी वर्षाको चेतावनीपछि जिल्लामा उद्धार र सतर्कताको तयारी तीव्र पारिएको छ।
यता विपद् व्यवस्थापन समितिको निर्देशनमा बाढीको उच्च जोखिम रहेका बस्तीहरूमा अग्रिम कारबाही सुरु गरेको जनाएको छ। त्यस्तै अविरल वर्षाका कारण धनुषाको जनकपुरधाम उपमहानगरपालिकाभित्रका सबै निजी विद्यालयहरू असोज १९ र २० गते बन्द हुने भएको छ ।

लगातारको वर्षाबाट उत्पन्न जोखिम र विद्यार्थी–अभिभावकको सुरक्षालाई मध्यनजर गर्दै विद्यालयहरू दुई दिनका लागि बन्द गर्ने निर्णय गरिएको हो । निजी विद्यालय सञ्चालकहरूको संगठन एनप्याब्सन जनकपुरधाम र प्याब्सन जनकपुरधामले संयुक्त रूपमा शनिबार सूचना जारी गर्दै विद्यालयहरू अस्थायी रूपमा बन्द रहने जानकारी दिएका हुन् ।
जनकपुरधाम र आसपासका क्षेत्रमा अविरल वर्षा भइरहेको छ । सडकका विभिन्न भागमा पानी जमेको, विद्यालयपरिसरमा हिलो र फोहोरको मात्रा बढेको र साथै यातायातमा अवरोध भएका कारण विद्यार्थीहरूको विद्यालय आवतजावत जोखिमपूर्ण बनेको छ ।