कार्तिकमा उखु रोपाइँ उपयुक्त, किसानलाई समयमै खेती गर्न विज्ञहरूको सुझाव

4 महीना पहिले प्रकाशित

(2082-07-01 B.S.)

597 पटक देखिएको

निरन्जन कुमार साह

गौशाला, कार्तिक १ गते ।

कृषि विज्ञहरूले यस वर्षको कार्तिक महिनालाई उखु रोपाइँका लागि सबैभन्दा उपयुक्त समय भएको बताएका छन्। अहिले किसानहरूले नगदे वालीका रूपमा चिनिने उखुको रोपाइँ सुरु गर्न थालेका छन्।गौशाला नगरपालिकाका कृषि शाखा प्रमुख कमलेश कुमार यादवका अनुसार उखु हिउँदे बाली भएकाले कार्तिक महिनामा रोपाइँ गर्नु सबैभन्दा लाभदायक हुन्छ।
“यो समयमा तापक्रम २० देखि २५ डिग्री सेल्सियससम्म रहँदा उखु अंकुरिनका लागि अनुकूल हुन्छ,” यादवले बताए।

उनका अनुसार अहिले जमिनमा पर्याप्त ओसिलोपन भएकाले उखुको जन्मेसन छिटो हुने र किरा रोगको प्रभाव पनि कम हुने सम्भावना रहन्छ। उखु रोपाइँपछि करिब १२ महिनामा बाली परिपक्व हुने भएकाले यस महिनामा रोपिएको उखु आगामी मंसिरतिरै क्रसिङ (पेल्ने) को लागि तयार हुने विज्ञहरूको भनाइ छ।

नेपालमा उखु खेती तराईका जिल्लाहरूमा व्यापक रूपमा हुने गर्दछ। उखुबाट चिनी, मिस्री, सखर र अन्य गुलियो पदार्थ उत्पादन गरिन्छ।यादवका अनुसार कार्तिक महिनामा रोपिएको उखुमा सुगरको मात्रा पनि उच्च हुने र बाली बलियो हुने भएकाले किसानले यस समयमा रोपाइँ गरे उत्पादन राम्रो हुने सम्भावना बढी रहन्छ।
कृषि विज्ञहरूले किसानहरूलाई माटोको तयारी, ओसिलोपन र उचित सिंचाइमा ध्यान दिन आग्रह गरेका छन्, ताकि आगामी वर्ष राम्रो उत्पादन लिन सकियोस्।