देउसी भैलो खेल्दा स्वास्थ्य र अनुशासनमा ध्यान दिन सुझाव

11 महीना पहिले प्रकाशित

(2082-07-05 B.S.)

744 पटक देखिएको

निरञ्जन कुमार साह

महोत्तरी, कार्तिक ५ गते । नेपालीहरुको मौलिक पर्व तिहारमा देशभर देउसी भैलोको रौनकता छाएको छ । देउसी खेल्न युवा मात्र होइन, बालबालिका र पाका उमेरका मानिसहरू पनि उत्साहपूर्वक सहभागी हुने गर्छन् । टोलीका नाइकेले लय हाल्दै नाच्ने, गीत गाउँदै दान संकलन गर्ने र मिठामिठा परिकार बाँड्ने परम्परा नेपाली संस्कृतिको विशेषता हो । तर, यसै रमाइलोका बीच स्वास्थ्य र अनुशासनमा पनि ध्यान दिन विशेषज्ञहरूले सुझाव दिएका छन् ।

स्वास्थ्यकर्मीहरूको भनाइमा लामो समय राती देउसी भैलो खेल्दा चिसोको कारण साना बालबालिका र वृद्धवृद्धामा रुघाखोकी, ज्वरो, टन्सिलजस्ता मौसमी रोग देखिने सम्भावना हुन्छ । त्यसैले चिसोबाट जोगिन तातो कपडा लगाउने, राती अबेरसम्म खेल्न नबस्ने र पर्याप्त आराम लिने सुझाव दिइएको छ ।

त्यस्तै, स्थानीय प्रशासनले तोकेको समयसीमा र नियमको पालना गर्न, विस्फोटक पदार्थ (पटाका, आतशबाजी) प्रयोग नगर्न, अश्लील वा समाजमा नकारात्मक असर पार्ने गीत–संगीत नगाउन, र देउसी भैलोका क्रममा अनुचित माग नगर्न पनि अनुरोध गरिएको छ ।

सामाजिक सन्देशसहितको मौलिक र शिष्ट भाषामा गीत गाउने, सभ्य ढंगले मनोरञ्जन गर्ने र अरूको असुविधा नहुने गरी पर्व मनाउने सन्देश पनि दिइएको छ । तिहारको उल्लासमा स्वास्थ्य, अनुशासन र मौलिकता जोगाउँदै देउसी भैलो खेल्दा नै यो पर्व अझ रमाइलो र अर्थपूर्ण बन्ने विशेषज्ञहरूको भनाइ छ ।