'प्रचण्ड' पुष २ गते गौशाला आउँदै, स्व. काशी महतोको श्रद्धाञ्जली कार्यक्रममा सहभागी हुने

2 महीना पहिले प्रकाशित

(2082-08-28 B.S.)

976 पटक देखिएको

निरन्जन कुमार साह

महोत्तरी, मंसिर २८ गते ।
नेपाली कम्युनिष्ट पार्टीका संयोजक तथा पूर्व प्रधानमन्त्री पुष्पकमल दाहाल (प्रचण्ड) पुष २ गते महोत्तरीको गौशाला आउने हुनुभएको छ । उहाँ स्वर्गीय काशी महतो (करण) को श्रद्धाञ्जली कार्यक्रममा सहभागी हुन गौशाला आउन लाग्नुभएको हो।

स्वर्गीय काशी महतोको श्रद्धाञ्जली कार्यक्रममा पार्टीका शीर्ष नेताहरूको सहभागिता रहने जानकारी नेपाली कम्युनिष्ट पार्टीका नेता सूर्यनारायण साहले दिनु भयो। उहाँको अनुसार जनयुद्धको १० वर्षे अवधिमा काशी महतोले योद्धाको रूपमा सक्रिय भूमिका निर्वाह गर्दै आफ्नो जीवन पार्टी र आन्दोलनका लागि समर्पण गर्नु भएको थियो।

माओवादी केन्द्रका जिम्मेवार नेता तथा हाल नेपाली कम्युनिष्ट पार्टीका नेता काशी महतो (करण) को निधन पार्टीका लागि ठूलो क्षति भएको केन्द्रीय नेता साहको भनाइ छ। उहाँले महतोको निधनले पार्टी मात्र नभई समग्र समाजलाई नै गहिरो क्षति पुगेको उल्लेख गर्दै दुःख व्यक्त गर्नुभयो ।

पार्टीले दिवङ्गत महतोप्रति हार्दिक श्रद्धाञ्जली अर्पण गर्दै शोकाकुल परिवारजनप्रति गहिरो समवेदना प्रकट गरेको छ। स्वर्गीय काशी महतोको मंसिर २३ गते आकस्मिक निधन भएको थियो।

श्रद्धाञ्जली कार्यक्रममा पूर्व प्रधानमन्त्री दाहालको उपस्थितिले दिवङ्गत नेताप्रति सम्मान प्रकट हुनुका साथै पार्टी एकता र आन्दोलनप्रतिको प्रतिबद्धता पुनः व्यक्त हुने पार्टी नेताहरूको भनाइ रहेको छ।