उखु बेच्न आएका किसानका लागि चिनी मिल ‘पीडाको थलो

2 महीना पहिले प्रकाशित

(2082-09-16 B.S.)

340 पटक देखिएको

महोत्तरी, पुष १६ गते ।

उखु बिक्रीका लागि देशकै ठूलो चिनी उद्योगमध्ये एक मानिने एभरेस्ट सुगर एन्ड केमिकल इन्डस्ट्रिज पुगेका किसान र सवारी चालकहरू गम्भीर मानवीय समस्यासँग जुधिरहेका छन्। गौशाला नगरपालिका–१, रामनगरस्थित उद्योग परिसरमा न्यूनतम सुविधाको अभाव हुँदा उनीहरू दिनौँसम्म कठिन अवस्थामा बस्न बाध्य भएका छन्।
मिलमा उखु बुझाउन आएका किसान र ट्र्याक्टर चालकहरूका लागि न त व्यवस्थित विश्राम स्थल छ, न त पर्याप्त खानपिनको व्यवस्था। पालो कुर्दाकुर्दै कतिपय किसानले आफ्नै ट्र्याक्टरमा वा सवारी साधनको मुनि रात बिताउनुपर्ने अवस्था रहेको जनाइएको छ।
खानाका लागि उचित क्यान्टिन नहुँदा बाहिरबाट महँगो मूल्यमा खाना ल्याउनुपर्ने बाध्यता रहेको चालक र किसानहरू बताउँछन्। यसले उनीहरूको दैनिक खर्च बढाएको छ भने थकान र असहजता झनै थपिएको छ।
सबैभन्दा पीडादायी समस्या शौचालयको अभाव भएको उनीहरूको गुनासो छ। सीमित शौचालय हुँदा वृद्ध, बिरामी तथा महिला किसानलाई विशेष कठिनाइ भइरहेको छ। कतिपय अवस्थामा लामो समय पालो कुर्नुपर्ने वा खुला स्थान प्रयोग गर्नुपर्ने बाध्यता रहेको बताइएको छ।
स्थानीय किसानहरूका अनुसार उखु उत्पादनमै ठूलो लगानी लाग्ने भएकाले मिलमा यसरी दिनौँ अल्झिँदा लागत अझै बढ्ने गरेको छ। समयमै उखु बुझाउन नसक्दा आर्थिक र मानसिक दुवै किसिमको दबाब खेप्नुपरेको उनीहरूको भनाइ छ।
स्थानीय बासिन्दा तथा सरोकारवालाहरूले हजारौँ किसान आउने उद्योगमा आधारभूत पूर्वाधार नहुनु गम्भीर विषय भएको बताएका छन्। उनीहरूका अनुसार यस्तो अवस्था किसानको सम्मान र मानवीय मर्यादासँग जोडिएको विषय हो।
पत्रकार तथा सामाजिक अभियन्ताहरूले समेत उद्योग व्यवस्थापन र सम्बन्धित निकायको उदासीनताप्रति प्रश्न उठाएका छन्। उनीहरूले किसान र चालकका लागि विश्रामस्थल, सुलभ क्यान्टिन तथा पर्याप्त शौचालयको व्यवस्था तत्काल गर्न माग गरेका छन्।

किसान तथा चालकहरूले चिनी मिल व्यवस्थापन, किसान संघ–संस्था र कृषि मन्त्रालयसँग तत्काल हस्तक्षेप गरी अवस्था सुधार गर्न आग्रह गरेका छन्।