चिसो बढ्दै गर्दा घरपालुवा जनावरमा विशेष ध्यान दिन नेपाल कृषि अनुसन्धान परिषदको आग्रह

8 महीना पहिले प्रकाशित

(2082-09-19 B.S.)

475 पटक देखिएको

निरन्जन कुमार साह

महोत्तरी,पुष १९ गते ।

मौसम परिवर्तनसँगै चिसो बढ्दै जाँदा घरपालुवा जनावरहरू विभिन्न रोगको जोखिममा परेका छन्। विशेषगरी तराई क्षेत्रमा केही दिनयता अत्यधिक हुस्सु र चिसो बढेकाले गाई, भैँसी, बाख्रा लगायतका घरपालुवा जनावरमा रुघाखोकी, ज्वरो तथा स्वास–प्रस्वाससम्बन्धी समस्या देखिन थालेको छ।

सोनमा गाउँपालिकाका किसान अनिल यादवका अनुसार चिसो बढेपछि पशुहरूमा स्वास्थ्य समस्या बढ्दै गएको छ। “गाई–भैँसी र बाख्रामा खोकी लाग्ने, ज्वरो आउने र सास फेर्न गाह्रो हुने समस्या देखिएको छ,” उनले जानकारी दिए।

यसैबीच नेपाल कृषि अनुसन्धान परिषद (नार्क) ले चिसो मौसममा घरपालुवा जनावरको विशेष हेरचाह गर्न किसानहरूलाई आग्रह गरेको छ। परिषदका अनुसार चिसोका कारण पशुहरू कमजोर भई विभिन्न रोग लाग्ने सम्भावना बढ्ने भएकाले गोठ–खोर न्यानो, सुख्खा र हावाबाट जोगिने गरी व्यवस्थापन गर्न आवश्यक छ।

नार्कले विशेषगरी भरखर जन्मेका बाछा–बाछी तथा पाठा–पाठीमा निमोनियाजस्ता गम्भीर समस्या देखिन सक्ने जोखिम उच्च रहेकाले थप सतर्कता अपनाउन आग्रह गरेको छ। यस्ता साना पशुहरूलाई चिसोबाट जोगाउन न्यानो कपडा, परालको उचित व्यवस्थापन र आम पशुसँगै सुरक्षित राख्न सुझाव दिइएको छ।

त्यसैगरी कुनै पनि अस्वाभाविक लक्षण देखिएमा ढिलाइ नगरी नजिकको भेटेरिनरी सेवा केन्द्रसँग सम्पर्क राख्न पनि परिषदले किसानहरूलाई अनुरोध गरेको छ। समयमै उपचार र उचित हेरचाह गरेमा पशुहरूलाई चिसो मौसमजन्य रोगबाट जोगाउन सकिने नार्कको भनाइ छ।