डाँका चोरीमा संलग्न तीन जना प्रहरीको नियन्त्रणमा

4 महीना पहिले प्रकाशित

(2082-10-15 B.S.)

352 पटक देखिएको

निरन्जन कुमार साह
गौशाला ,माघ १४ गते
महोत्तरी जिल्लाको गौशाला नगरपालिकामा भएको डाँका चोरी घटनामा संलग्न तीन जनालाई प्रहरीले नियन्त्रणमा लिएको छ।
माघ १४ गते राति अन्दाजी २०:३० बजेको समयमा महोत्तरी जिल्ला, गौशाला नगरपालिका–१२, प्रडरिया टोलमा डाँका चोरीको घटना भएको थियो। गौशाला नगरपालिका–१२ का स्थायी बासिन्दा विषेश्वर सिंह कुशवाहा ज.५ प ४३२४ नम्बरको डिस्कभर मोटरसाइकल चलाउँदै जाँदै गरेको अवस्थामा तीन जनाको समूहले बाटो छेकी रोकी पछाडिबाट फलामको रडले टाउकोमा प्रहार गरी गम्भीर घाइते बनाएका थिए। सोही क्रममा उनीहरूको मोटरसाइकल र मोबाइल फोन एक थान लुटी फरार भएका थिए।
घटनामा संलग्न व्यक्तिहरूमा सोही स्थानका स्थायी बासिन्दा धर्मेन्द्र साह सोनारका छोरा अन्दाजी १८ वर्षीय निर्मल साह सोनार, अजब लाल सिंह कुशवाहाका छोरा अन्दाजी १८ वर्षीय नितेश कुमार कुशवाहा तथा रामप्रीत रामका छोरा अन्दाजी १८ वर्षीय मनिष राम रहेका छन्।
घटनाबारे सूचना प्राप्त हुनासाथ इलाका प्रहरी कार्यालय गौशाला मातहत प्रहरी चौकी कान्तिबजार तथा इलाका प्रहरी कार्यालय गौशालाबाट खटिएको प्रहरी टोलीले खोजतलास गर्ने क्रममा माघ १५ गते बिहान अन्दाजी १०:०० बजे गौशाला नगरपालिका–१२ स्थित गौशाला र सर्लाही जिल्लाको सिमानामा रहेको जंगलमा लुकिछिपी बसेको अवस्थामा उनीहरूलाई पक्राउ गरेको हो।
पक्राउ परेका तीनै जनालाई कानून बमोजिम नियन्त्रणमा लिई इलाका प्रहरी कार्यालय गौशालामा ल्याई थप अनुसन्धान कार्य भइरहेको प्रहरीले जनाएको छ।