महोत्तरी, फागुन ५ गते
निरञ्जन कुमार साह
महोत्तरी जिल्लास्थित श्री टुटेश्वरनाथ साझेदारी वन उपभोक्ता समूहको चौथो साधारण सभा मंगलबार समूहको कार्यालयमा सम्पन्न भएको छ। सभामा समूहका अध्यक्ष विनय कुमार झाको अध्यक्षतामा विभिन्न सरोकारवाला निकाय तथा समुदायका प्रतिनिधिहरूको उल्लेखनीय उपस्थिति रहेको थियो।
कार्यक्रममा डिभिजन वन कार्यालय महोत्तरीका प्रमुख अजय मिश्र, लक्ष्मीनियाँ वन उपभोक्ता समितिका अध्यक्ष बलराम यादव, समूहअन्तर्गतका विभिन्न वडाका वडा अध्यक्षहरू तथा समिति पदाधिकारीहरूको सहभागिता रहेको थियो।
सभामा वक्ताहरूले वन संरक्षण समुदायको मूल कर्तव्य भएकोमा जोड दिँदै “हाम्रो वन, हरियो वन” अभियानलाई थप प्रभावकारी बनाउन सबैले हातेमालो गर्नुपर्ने बताए। वन जोगिए मात्र वातावरण सन्तुलन, जैविक विविधता र मानव जीवन सुरक्षित रहने धारणा व्यक्त गर्दै वक्ताहरूले वन संरक्षणमा सामुदायिक एकता आवश्यक रहेको उल्लेख गरे।
त्यसैगरी, सरकारी दररेटअनुसार सस्तो मूल्यमा काठ तथा दाउरा उपभोग गर्न उपभोक्ताहरूलाई आग्रह गरिएको थियो। वन उपभोक्ता समूहमार्फत सहुलियत दरमा काठ उपलब्ध गराउँदै आएको जानकारी दिँदै यसबाट सबै समुदायलाई प्रत्यक्ष लाभ पुगेको वक्ताहरूले बताए।
कार्यक्रमका क्रममा केही स्थानीयले सामाजिक न्यायका विषयसमेत उठाएका थिए। स्थानीय रामभगत मण्डलले दलित समुदायलाई निःशुल्क काठ उपलब्ध गराउनुपर्ने माग राखे भने बलवा–९ का उदय कान्तले एकल महिला, गरिब तथा दलित परिवारलाई निःशुल्क काठ वितरणको व्यवस्था गर्नुपर्ने धारणा व्यक्त गरे।
वन क्षेत्रमा बढ्दो डढेलो तथा आगजनीप्रति चिन्ता व्यक्त गर्दै अध्यक्ष विनय कुमार झाले वन संरक्षणका लागि समूह दिनरात सक्रिय रहेको बताए। उनले केही व्यक्तिले मनसायपूर्वक वनमा आगजनी गर्ने गरेको गुनासो गर्दै यस्तो कार्यले समग्र समुदायलाई जोखिममा पार्ने बताए। “वन सबै समुदायको साझा सम्पत्ति हो, यसलाई जोगाउनु हामी सबैको दायित्व हो,” उनले भने।
साथै, जंगली जनावरका लागि वनभित्र विभिन्न स्थानमा पानीको व्यवस्था गर्नुपर्ने सुझावसमेत सभामा उठाइएको थियो। अन्त्यमा अध्यक्ष झाले वन विनाशका गतिविधिविरुद्ध एकजुट भई वन संरक्षण अभियानलाई सशक्त बनाउन सबैमा आह्वान गर्दै कार्यक्रम समापन गरेका थिए ।