मधेशमा धान रोपाइँ ९७.७१ प्रतिशत सम्पन्न

29 दिन पहिले प्रकाशित

(2083-04-29 B.S.)

220 पटक देखिएको

निरन्जन कुमार साह

महोत्तरी, साउन २९ गते
मधेश प्रदेशमा यस वर्षको धान रोपाइँ अन्तिम चरणमा पुगेको छ। मधेश प्रदेश सरकार, भूमि व्यवस्था, कृषि तथा सहकारी मन्त्रालयअन्तर्गत कृषि विकास निर्देशनालयले सार्वजनिक गरेको जिल्लागत विवरणअनुसार प्रदेशमा धान रोपाइँ हुने कुल क्षेत्रफलमध्ये हालसम्म ९७.७१ प्रतिशत क्षेत्रमा रोपाइँ सम्पन्न भएको छ।
निर्देशनालयको विवरणअनुसार मधेश प्रदेशमा धान रोपाइँका लागि कुल ३ लाख ८२ हजार ४ सय ३३ हेक्टर क्षेत्रफल रहेकोमा हालसम्म ३ लाख ७३ हजार ६ सय ९३.२९ हेक्टर क्षेत्रमा धान रोपाइँ सम्पन्न भएको छ।
जिल्लागत रूपमा सिरहा र बारा जिल्लामा शतप्रतिशत धान रोपाइँ सम्पन्न भएको विवरणमा उल्लेख छ। सर्लाहीमा ९९ प्रतिशत, धनुषामा ९५ प्रतिशत, सप्तरीमा ९५ प्रतिशत तथा पर्सामा ९८ प्रतिशत हाराहारीमा रोपाइँ सम्पन्न भएको छ।
यस्तै, महोत्तरीमा धान रोपाइँ हुने ४० हजार हेक्टर क्षेत्रफलमध्ये ३४ हजार ७ सय २१ हेक्टरमा रोपाइँ सम्पन्न भएको छ, जुन करिब ८६.८० प्रतिशत हो।
निर्देशनालयले जिल्लागत धान रोपाइँको अवस्थासम्बन्धी साप्ताहिक विवरण सार्वजनिक गर्दै आएको जनाएको छ। अधिकांश जिल्लामा रोपाइँ सम्पन्न भइसकेकाले अब बाँकी क्षेत्रमा पनि रोपाइँ छिट्टै सम्पन्न हुने अपेक्षा गरिएको छ।