बाढीपीडितका लागि रामजानकी स्कुलद्वारा ३५ हजार रुपैयाँ सहयोग

8 दिन पहिले प्रकाशित

(2083-05-19 B.S.)

59 पटक देखिएको

महोत्तरी, भदौं १९ गते ।

रसुवासहित देशका विभिन्न क्षेत्रमा बाढीबाट प्रभावित परिवारहरूको राहत, उद्धार तथा पुनःस्थापनामा सहयोग पुर्‍याउने उद्देश्यले महोत्तरीको गौशालास्थित रामजानकी सेकेण्डरी इङ्गलिस बोर्डिङ स्कुलले ३५ हजार रुपैयाँ चन्दा संकलन गरेको छ।

विद्यालयले ५०० भन्दा बढी विद्यार्थी, शिक्षक तथा कर्मचारी र विद्यालयको तर्फबाट रकम संकलन गरी बाढीपीडितका लागि सहयोग जुटाएको जनाएको छ।

संकलित रकममध्ये विद्यार्थीहरूबाट ८ हजार ३३० रुपैयाँ, शिक्षक तथा कर्मचारीहरूबाट ११ हजार ३०० रुपैयाँ र विद्यालयको तर्फबाट १५ हजार ३७० रुपैयाँ सहयोग गरिएको हो। यसरी कुल ३५ हजार रुपैयाँ संकलन भएको विद्यालयले जनाएको छ।

विद्यालयका अनुसार रसुवा तथा अन्य बाढी प्रभावित क्षेत्रमा रहेका परिवारहरूको राहत, उद्धार, खाना, लत्ताकपडा व्यवस्थापन तथा पुनःस्थापनामा सहयोग पुग्ने उद्देश्यले उक्त रकम संकलन गरिएको हो।

विद्यालय प्रशासनले विपद्को समयमा विद्यार्थीहरूमा सामाजिक उत्तरदायित्व र मानवीय सेवाको भावना विकास गर्ने उद्देश्यले पनि यस्तो अभियान सञ्चालन गरिएको जनाएको छ। विद्यालयले संकलित रकम सम्बन्धित राहत कोष वा बाढीपीडितको सहयोगका लागि हस्तान्तरण गरिने जानकारी दिएको छ।