दुई बिघा जग्गा बेचेर श्रीमतीलाई हात्ती उपहार !

5 वर्ष पहिले प्रकाशित

(2077-06-08 B.S.)

6187 पटक देखिएको

असोज ८

पतिपत्नीले एक अर्काको इच्चा पूरा गर्नका लागि के सम्म गर्न सक्छन् ? कस्तोसम्म उपहार दिन सक्छन् ? यसको ठ्याक्कै उत्तर त कसैसँग पनि छैन । दुलाल चन्द्र रायले आफ्नी पत्नीको इच्छा पूरा गर्नका लागि जमिन बेचेर हात्ती किनिदिएका छन् । उनको यो तरिका चर्चाको विषय बनेको छ ।

बंगलादेशको लालमोनिरहाट पन्चग्राम निवासी दुलाल चन्द्र रायले आफ्नी श्रीमती तुलसी रानी दासका लागि हात्ती किन्न जमिन बेचेको हुन् । राय एक किसान हुन् । उनले आफ्नो दुई बिघा जमिन बेचे अनि मौलवी बजार गएर १६ लाख ५० हजार टाका(बंगलादेशी मुद्रा)मा हात्ती किने अनि २० हजार भाडा तिरेर ट्रकमा राखी घरमा ल्याए।

रायकी पत्नी दासीले १ वर्षपहिले एक सपना देखेको पतिलाई बताएकी थिइन् । उनले सपनामा हात्ती किनेको र त्यसको रेखदेख गरिरहेका देखेकी थिइन् । उनले यसअघि पनि सपनामा जनावरहरू देख्दा पतिले त्यही जनावर किनेका थिए । केही वर्ष पहिले उनले सपनामा देखे अनुसार घोडा र बाख्रा किनिएको थियो ।
‘मैले जमिन बेचेँ र मेरी श्रीमतीको सपना पूरा गर्नका लागि हात्ती किनें’ दुलाल भन्छन् ।

दुलाल चन्द्र रायले हात्तीको रेखदेखका लागि १५ हजार तलबमा माहुते पनि राखेका छन् । उनको घरमा हात्ती हेर्नलाई वरपरका गाउँहरुबाट समेत मान्छेहरु भीड लाग्ने गरेका छन् ।

हात्ती हेर्नका लागि आएकी उनकै गाउँकी सन्तोना रानीले भनिन्, ‘आफ्नी श्रीमतीको सपना पूरा गर्नका लागि हात्ती किन्ने मान्छे जीवनमा पहिलो पटक देखेको हुँ ।’