आइतबारदेखि विद्युत महसुल संकलन काउन्टर खुल्ला गर्ने भएको छ ।

6 वर्ष पहिले प्रकाशित

(2077-01-28 B.S.)

1756 पटक देखिएको

जनकपुर नेपाल विद्युत प्राधिकरण जनकपुर वितरण केन्द्रले आइतबारदेखि विद्युत महसुल संकलन काउन्टर खुल्ला गर्ने भएको छ । प्राधिकरण वितरण तथा ग्राहक सेवा निर्देशनालयको सर्कुलेशनपछि सावधानीका उपाय अपनाएर महसुल संकलन काउन्टर खोल्ने निर्णय गरेको हो ।

वितरण केन्द्रले एक सूचना जारी गरी आइतबार बिहान ९ देखि अपरान्ह ४ बजेसम्म ग्राहक वर्गका लागि महसुल संकलन काउन्टर खुल्ला राख्ने जनाएको छ । वितरण केन्द्रले महसुल तिर्न कार्यालयमा आउने सबै ग्राहकलाई अनिवार्यरूपमा मास्क लगाउन, थर्मल गनबाट तापक्रम परीक्षण गराउन, साबुन पानीले प्रक्रिया पुर्याएर २० सेकेन्डसम्म हात धुन तथा सेनिटाइजर लगाएपछि मात्र महसुल तिर्न आग्रह गरेको छ ।

महसुल बुझाउन पालो पर्खिने क्रममा गोलो घेराभित्र बस्नु पर्ने, घेराभन्दा बढी ग्राहक रहेको अवस्थामा १ मिटरको दुरीमा लाइनमा बस्ने नियम पालना गर्न अनुरोध गरिएको छ । महसुल तिर्न आउने ग्राहकले बिलमा भएको रकमअनुसारको रकम लिएर आउन पनि ग्राहकलाई अनुरोध गरिएको वितरण केन्द्रले जनाएको छ ।

वितरण केन्द्रका अनुसार जेठ १ गतेदेखि मिटर रिडिङको काम समेत सुचारु गर्ने निर्णय गरिएको छ । सरकारले कोरोना भाइरस ९कोभिड–१९० को संक्रमण रोक्न गत चैत ११ गतेदेखि लकडाउन सुरु गरेपछि वितरण केन्द्रले बढी भिडभाड हुने महसुल संकलन काउन्टर र मिटर रिडिङ कार्य बन्द गरेको थियो ।

वितरण केन्द्रको गत फागुनदेखिको महसुल उठाउन बाँकी छ । केही ग्राहकले अनलाइन भुक्तानी सेवाबाट महसुल तिरे पनि अधिकांश ग्राहकको मिटर रिडिङ तथा महसुल उठाउन कार्य बाँकी छ । प्राधिकरणको निर्देशनपछि केही वितरण केन्द्रले काउन्टर खोलिसकेका छन् । बाँकी वितरण केन्द्रले पनि आइतबारदेखि काउन्टरको सेवा सुचारु गर्दैछन्