समुदायिक विद्यालयका विद्यार्थीलाई मनोबल बढाउन नगद पुरस्कार वितरण

8 महीना पहिले प्रकाशित

(2082-01-28 B.S.)

661 पटक देखिएको

निरन्जन कुमार साह
गौशाला, महोत्तरी

गौशाला नगरपालिका अन्तर्गत रहेको श्री त्रिभुवन नमुना माध्यमिक विद्यालय, गौशालाले वार्षिक परीक्षामा उत्कृष्ट प्रदर्शन गर्ने विद्यार्थीलाई नगद पुरस्कारसहित सम्मान गर्दै प्रेरणा प्रदान गरेको छ।
आइतबार विद्यालय परिसरमै आयोजित "समान तथा पुरस्कार वितरण कार्यक्रम" मा बाल विकासदेखि कक्षा ९ सम्मका विद्यार्थीलाई नगद पुरस्कार प्रदान गरिएको हो।

हालै सम्पन्न वार्षिक परीक्षामा उत्कृष्ट प्रदर्शन गर्ने प्रथम, द्वितीय र तृतीय स्थान प्राप्त विद्यार्थीलाई क्रमशः रु ३०००, रु २००० र रु १००० नगद पुरस्कार प्रदान गरिएको विद्यालयका प्रधानाध्यापक बिनोद महतोले जानकारी दिए।
कार्यक्रममा गौशाला वडा न. ४ निवासी समाजसेवी तथा शिक्षा प्रेमी सन्तोष निरौलाले आफ्नै खर्चमा पुरस्कार वितरण गर्दै सामुदायिक विद्यालयप्रतिको लगाव र जिम्मेवारी प्रदर्शन गरेका हुन्। कार्यक्रममा बोल्दै उनले भने, “मैले यही विद्यालयबाट आफ्नो अध्ययन यात्रा सुरु गरेर जीवनमा प्रगति गरेको छु। सामुदायिक विद्यालयले पनि सक्षम विद्यार्थी उत्पादन गर्न सक्छ भन्ने उदाहरण म स्वयं हुँ।”
उनले प्रत्येक वर्ष आफ्नो आम्दानीको एक हिस्सा शिक्षा क्षेत्रमा खर्च गर्ने प्रतिबद्धता व्यक्त गर्दै भने, “पढ्न चाहने विद्यार्थीलाई प्रेरणा दिनु, उनीहरूलाई सघाउनु मेरो धर्म हो। शिक्षा मात्र हो जसले समाजलाई उज्यालो बनाउँछ।”

कार्यक्रममा विद्यालय व्यवस्थापन समितिका अध्यक्ष रमेश महतो , शिक्षकहरु , प्रधानाध्यापक बिनोद महतो, विद्यार्थीहरुको उपस्थिति रहेको थियो। सहभागीहरूले सन्तोष निरौलाको योगदानको खुलेर प्रशंसा गर्दै यस्ता पहलले समुदायिक विद्यालयप्रति जनविश्वास बढाउने र विद्यार्थीलाई अझ मेहनत गर्न प्रेरित गर्ने धारणा राखे।