गौशालामा कराते प्रतियोगिता सम्पन्न (फोटो फिचर )

2 वर्ष पहिले प्रकाशित

(2080-06-13 B.S.)

5518 पटक देखिएको

निरन्जन कुमार साह

गौशाला , असोज १३ गते

महोत्तरीको गौशालामा जुनियर कराते प्रतियोगिता सम्पन्न भएको छ । गौशाला नगरपालिका वडा न. २ निगौल स्थित नेपाल क्योकुशिन बुदो कराते साकाई इन्टरनेशनलको आयोजनामा भएको जुनियर बेल्ट टेस्ट प्रतियोगितामा राम जानकी इंगलिस बोर्डिंग स्कुलका विद्यार्थीहरु लगायत विभिन्न खेलाडीहरु विजय भएका छन् ।

“स्वास्थ्यका लागि खेलकुद , राष्ट्रको लागि खेलकुद” भन्ने मूल नाराका साथ भएको कराते प्रतियोगितामा गौशाला नगरपालिकाका नगर प्रमुख डा. दिपेन्द्र महतो , नेपाल क्योकुशिन बुदो कराते साकाई इन्टरनेशनलको मधेश प्रदेश अध्यक्ष संजिव चौधरी, वडा न. २ को वडा अध्यक्ष श्याम सुन्दर मण्डल लगायत विभिन्न प्रतिष्पर्धीहरुको सहभागिता रहेको थियो ।

कार्यक्रममा राम जानकी बोर्डिंग स्कुल र गौशाला डोजोका विद्यार्थीलाई कराते टेस्ट गरि ओरेन्ज बेल्ट प्रदान गरिएको नेपाल क्योकुशिन बुदो कराते साकाई इन्टरनेशनलको मधेश प्रदेश अध्यक्ष संजिव चौधरीले जानकारी दिए । उत्कृष्ट खेल्ने विद्यार्थीहरुलाई नगर प्रमुख महतोद्वारा ओरेन्ज बेल्ट प्रदान गरिएको छ ।

कार्यक्रममा आफ्नो मन्तव्य दिदै नगर प्रमुख महतोले गौशाला नगरपालिकाका इच्छुक सम्पूर्ण विद्यार्थीहरुलाई कराते लगायत यस्ता विभिन्न खेलकुदहरु प्रति अग्रसर गराउनु आवश्यक रहेको बताए । उनले भने , "खेल स्वास्थ्यको लागि अपरिहार्य छ । साथै यसले राष्ट्रिय तथा अन्तराष्ट्रिय स्तरमा नाम स्थापित गर्न सहज हुन्छ । त्यसैले गौशाला नगरपालिकाले खेलकुदमा पनि आवश्यक अनुसार लगानी गर्ने कुरामा म प्रतिवद्ध छु ।"

नगर प्रमुख महतोले गौशालामा कराते लगायत विभिन्न खेलकुदहरु हुने व्यवस्थापन गर्नको लागि सक्दो प्रयास गर्ने दावी गरेका छन् ।