मन्त्री र सचिवले समय नदिँदा मन्त्रालय अस्तव्यस्त

4 वर्ष पहिले प्रकाशित

(2078-09-18 B.S.)

2610 पटक देखिएको

पुष १९

प्रदेश २ को खानेपानी तथा उर्जा विकास मन्त्रालयमा मन्त्री र सचिवले समय नदिँदा मन्त्रालय अस्त– व्यस्त बनेको छ ।

खानेपानी तथा उर्जा विकास मन्त्री ओम प्रकाश शर्मा, सचिव प्रेम कुमार सिंहले मन्त्रालयमा समय नदिँदा मन्त्रालयको काम कारवाही प्रभावित बनेको छ ।मन्त्रालय स्थापना भएको ६ महिना भन्दा बढी समय भइसक्दा पनि मन्त्रालयले विकास निर्माणको कुनै पनि काम गर्न सकेको छैन । मन्त्री शर्मा र सचिव प्रायः जनकपुरधाम भन्दा बाहिर रहने गरेकोले मन्त्रालयबाट हुने नीतिगत निर्णय तथा मन्त्रालयबाट हुने विकास निर्माणका काममा अवरोध सृजना भएको छ ।

मन्त्रालयमा अहिले तीन जना मात्रै स्थायी कर्मचारी रहेको कम्पुटर अपरेटर दिलिप साहले बताए । मन्त्री शर्मा वीरगञ्ज उद्योग वाणिज्य संघका पूर्व अध्यक्ष समेत हुन् । पेशाले व्यापारी रहेका मन्त्री शर्माले एक/ दुई हप्तामा मात्रै दुई तीन घण्टाको लागि जनकपुर आउने गरेको नाम नखुलाउने सर्तमा मन्त्रालयकै एक कर्मचारीले बताए । मन्त्रालयमा मन्त्री नै नबस्दा सचिव सिंह पनि प्रायः मन्त्रालयमा अनुपस्थित हुने गरेको ती कर्मचारीले स्पष्ट गरे ।यता, मन्त्री शर्माका स्वकीय सचिव सुजित मिश्रले मन्त्री शर्माको स्वास्थ्य अवस्था ठिक नरहेकोले मन्त्रालयमा कम समय दिने गरेको बताए ।