महोत्तरी, असार ८ गते ।

महोत्तरीको रामगोपालपुर नगरपालिकाले १४औँ नगरसभा सम्पन्न गर्दै आर्थिक वर्ष २०८३/८४ का लागि करिब ५० करोड रुपैयाँ बराबरको बजेट, नीति तथा कार्यक्रम सार्वजनिक गरेको छ। नगर प्रमुख रामदुलार साहको अध्यक्षतामा सम्पन्न नगरसभाका प्रमुख अतिथि मधेश प्रदेशका पूर्व मुख्यमन्त्री सरोज कुमार यादव रहेका थिए। कार्यक्रममा वडा नं. १ देखि ९ सम्मका वडा अध्यक्ष, जनप्रतिनिधि, राजनीतिक दलका प्रतिनिधि, कर्मचारी तथा सर्वसाधारणको उल्लेख्य उपस्थिति रहेको थियो।
नगरसभाले कृषि, पशुपालन, शिक्षा, स्वास्थ्य, पर्यटन, रोजगार, सहकारी तथा भौतिक पूर्वाधार विकासलाई प्राथमिकतामा राख्दै नीति तथा कार्यक्रम अघि सारेको छ।
कृषि क्षेत्रतर्फ कृषि सडक, कृषि विद्युतीकरण तथा सिँचाइ प्रणालीको विस्तारलाई निरन्तरता दिइने, जैविक खेतीलाई प्रोत्साहन गरिने, कोल्ड स्टोर सञ्चालनमा ल्याइने तथा माटो परीक्षण कार्यक्रम सञ्चालन गरिने उल्लेख गरिएको छ। साथै “एक घर, एक करेसाबारी” कार्यक्रममार्फत महिलालाई लक्षित गरी तरकारी उत्पादन, कृषि औजार तथा बीउबिजन वितरण गरिनेछ। किसानलाई कृषि तथा पशु बिमामा प्रोत्साहन, कृषि मिटरमा अनुदान, मलखाद खेतीको विस्तार तथा फलफूल खेती प्रवर्द्धनका कार्यक्रम पनि समावेश गरिएको छ।
उद्योग, वाणिज्य, पर्यटन र रोजगार क्षेत्रतर्फ स्थानीय उद्योग व्यवसायको अभिलेखीकरण, सीपमूलक तालिम, लघुउद्यम विकास तथा रोजगार सिर्जनाका कार्यक्रम सञ्चालन गरिने जनाइएको छ। रामगोपालपुर बजारको थप सौन्दर्यीकरण, पोखरी तथा धार्मिक स्थलहरूको संरक्षण र पर्यटन विकासका लागि पूर्वाधार निर्माणलाई निरन्तरता दिइनेछ। लिट्टीघाट पोखरीको सौन्दर्यीकरणका लागि १ करोड रुपैयाँ बजेट विनियोजन गरिएको छ।
शिक्षा क्षेत्रलाई विशेष प्राथमिकतामा राख्दै सामुदायिक विद्यालयको भौतिक पूर्वाधार सुधार, डिजिटल हाजिरी प्रणाली, प्रविधिमैत्री शिक्षण सिकाइ, उत्कृष्ट शिक्षक तथा विद्यार्थीलाई सम्मान, निःशुल्क पाठ्यपुस्तक वितरण तथा विद्यालयमा गुणस्तरीय शिक्षाको सुनिश्चितताका कार्यक्रम ल्याइएको छ। कक्षा १ देखि १२ सम्म निःशुल्क अध्ययनको व्यवस्था, छात्रवृत्ति कार्यक्रम, स्थानीय मैथिली पाठ्यक्रम निर्माण तथा विपन्न र दलित बस्तीमा कोचिङ कक्षा सञ्चालन गरिने नीति लिइएको छ। श्री महेन्द्र राष्ट्रिय माध्यमिक विद्यालयको अधुरो भवन निर्माण सम्पन्न गर्न १ करोड ५५ लाख रुपैयाँ विनियोजन गरिएको छ।
स्वास्थ्य क्षेत्रतर्फ ६० वर्षमाथिका ज्येष्ठ नागरिकका लागि घरदैलो स्वास्थ्य परीक्षण, स्वास्थ्य संस्थामा औषधिको नियमित आपूर्ति, विपन्न नागरिकलाई प्रयोगशाला शुल्कमा ५० प्रतिशत छुट, क्षयरोगीका लागि पोषण प्याकेज, स्वास्थ्य बिमा कार्यक्रमलाई निरन्तरता तथा महिला स्वास्थ्य स्वयंसेविकाको प्रोत्साहन भत्ता वृद्धि गर्ने व्यवस्था गरिएको छ। नगरपालिकालाई आगामी आर्थिक वर्षमा पूर्ण खोप पालिका घोषणा गर्ने लक्ष्य लिइएको छ। निःशुल्क एम्बुलेन्स सेवाको निरन्तरताका लागि थप एउटा नयाँ एम्बुलेन्स खरिद गरिने तथा क्यान्सर, मिर्गौला र डायलाइसिस गराइरहेका बिरामीलाई मासिक आर्थिक सहयोगलाई निरन्तरता दिइने उल्लेख गरिएको छ।
नगर प्रमुख रामदुलार साहले प्रस्तुत बजेट जनमुखी, विकासमुखी र समावेशी रहेको बताउँदै कृषि, शिक्षा, स्वास्थ्य तथा पूर्वाधार विकासमार्फत नगरवासीको जीवनस्तर सुधार गर्ने लक्ष्य राखिएको बताए। प्रमुख अतिथि सरोज कुमार यादवले बजेटको प्रभावकारी कार्यान्वयनमार्फत नगरको समग्र विकासमा टेवा पुग्ने विश्वास व्यक्त गरेका थिए।