महोत्तरी–१ मा उत्साहको लहर: गिरिराज मणि पोखरेलतर्फ बढ्दो जनविश्वास

4 महीना पहिले प्रकाशित

(2082-11-09 B.S.)

531 पटक देखिएको

रोहित यादव
महोत्तरी, फाल्गुन ९ गते ।

महोत्तरी क्षेत्र नं. १ मा चुनावी माहोल दिनानुदिन तातिँदै गएको छ। गाउँ बस्तीका चौतारीदेखि बजारका चिया पसलसम्म अहिले एउटै चर्चा छ । यसपटकको जित कसको ? स्थानीय राजनीतिक समीकरण हेर्दा नेपाली कम्युनिस्ट पार्टीका उम्मेदवार गिरिराज मणि पोखरेलप्रति देखिएको जनसमर्थनले चुनावी समीकरणलाई रोचक बनाएको छ।
स्थानीय मतदाताहरूका अनुसार क्षेत्र नं. १ मा विकासको निरन्तरताका लागि पोखरेल नै भरोसायोग्य विकल्प हुन्। २०७४ सालमा विजयी भएपछि उनले निर्वाचन क्षेत्रमा भित्र्याएका पूर्वाधार, शिक्षा र स्वास्थ्यसम्बन्धी परियोजनाहरूलाई धेरैले “देखिने विकास”को रूपमा व्याख्या गरेका छन्। सडक स्तरोन्नति, शैक्षिक संस्थामा संरचनागत सुधार र सामाजिक सुरक्षाका कार्यक्रमलाई मतदाताले सकारात्मक रूपमा स्मरण गरिरहेका छन्।
एक स्थानीय युवा भन्छन्, “उहाँले बोलेका कुरा मात्रै होइन, काम गरेर देखाउनुभएको छ। विकासको गति रोक्न नदिन फेरि उहाँलाई नै रोज्छौं।”
अर्का एक जेष्ठ नागरिकको भनाइ छ, “जनताको मुद्दामा सधैं अगाडि देखिनुहुन्छ। हाम्रा समस्या सुन्ने नेतामध्ये उहाँ अग्रस्थानमा हुनुहुन्छ।”
पार्टीका कार्यकर्ताहरूका अनुसार यसपटकका प्रमुख एजेन्डामा गरिबी न्यूनीकरण, सार्वजनिक पदाधिकारीहरूको सम्पत्ति छानबिन, पाँच लाख युवालाई रोजगारी सिर्जना, एक वर्षभित्र किसान कार्ड वितरण, सहुलियत ऋण व्यवस्था, मन्त्रीहरूको संख्या घटाउने तथा शिक्षालाई पूर्ण रूपमा निःशुल्क बनाउने जस्ता महत्वाकांक्षी योजना समावेश छन्। यिनै प्रतिबद्धताले मतदातामा थप उत्साह जगाएको उनीहरूको दाबी छ।
चुनाव नजिकिँदै जाँदा महोत्तरी १ मा राजनीतिक सरगर्मी उत्कर्षमा पुगेको छ। विभिन्न दलका उम्मेदवारहरू आ आफ्ना कार्यक्रमसहित घरदैलो अभियानमा सक्रिय छन्। तर स्थानीय परिवेशमा भने गिरिराज मणि पोखरेलप्रति देखिएको उत्साह र समर्थनले चुनावी प्रतिस्पर्धालाई थप रोमाञ्चक बनाएको छ।