महोत्तरी क्षेत्र न. ४ मा महेन्द्र कुमार रायलाई श्रीपुरवासीको उत्साहजनक समर्थन, घरदैलो अभियानमा जनलहर

4 महीना पहिले प्रकाशित

(2082-11-09 B.S.)

301 पटक देखिएको

जितेन्द्र कुशवाहा
महोत्तरी, फाल्गुन ९ गते ।

महोत्तरी निर्वाचन क्षेत्र नं. ४ मा महेन्द्र कुमार रायको पक्षमा जनसमर्थन बढ्दै गएको देखिएको छ। नेपाली कांग्रेसका तर्फबाट उम्मेदवारी दिएका रायको घरदैलो अभियान अन्तर्गत श्रीपुर क्षेत्रमा पुगेको टोलीलाई स्थानीय बासिन्दाले उत्साहजनक स्वागत गरेका छन्।
घरदैलो कार्यक्रमका क्रममा श्रीपुरका विभिन्न टोल–टोलमा पुग्दा स्थानीयहरूले फूलमाला, आशीर्वाद तथा शुभकामना व्यक्त गर्दै विजयको अग्रिम शुभकामना दिएका थिए। विशेषगरी युवाहरूको सक्रिय उपस्थिति र सहभागिताले अभियानलाई थप प्रभावकारी बनाएको देखिएको छ। ज्येष्ठ नागरिकहरू समेत घरआँगनमै बसेर उम्मेदवारलाई समर्थन जनाउँदै परिवर्तन र स्थायित्वका लागि आफ्नो मत प्रयोग गर्ने प्रतिबद्धता व्यक्त गरेका छन्।
अभियानका क्रममा रायले स्थानीयसँग प्रत्यक्ष संवाद गर्दै क्षेत्रको विकास, शिक्षा, स्वास्थ्य, सडक पूर्वाधार, रोजगार सिर्जना र सुशासनलाई आफ्नो मुख्य प्राथमिकता रहेको बताए। उनले विगतमा अधुरा रहेका योजनाहरूलाई पूर्णता दिने र नयाँ सम्भावनाहरूलाई मूर्तरूप दिने प्रतिबद्धता व्यक्त गरेका थिए। “जनताको विश्वास नै मेरो सबैभन्दा ठूलो शक्ति हो,” उनले भने, “महोत्तरी–४ लाई समृद्ध र व्यवस्थित क्षेत्र बनाउनु मेरो लक्ष्य हो।”
यसै क्रममा श्रीपुर निवासी तनुकलाल यादवले प्रतिक्रिया दिँदै भन्नुभयो, “हामी श्रीपुरवासी महेन्द्र कुमार रायलाई विश्वासका साथ मत दिने निर्णयमा पुगेका छौँ। विकास, सुशासन र जनताको हितका लागि उहाँ उपयुक्त उम्मेदवार हुनुहुन्छ। म १०२ वर्षको उमेरमा पनि उहाँलाई विजय गराउन सम्पूर्ण प्रयास गर्नेछु।”
स्थानीय बासिन्दाहरूका अनुसार महोत्तरी–४ मा दीर्घकालीन विकास र राजनीतिक स्थायित्वका लागि सक्षम र अनुभवी नेतृत्व आवश्यक रहेको भन्दै रायलाई विजयी गराउन सबै एकजुट हुने वातावरण बनेको छ।
घरदैलो अभियान आगामी दिनहरूमा क्षेत्रका अन्य बस्तीहरूमा समेत निरन्तर जारी रहने जनाइएको छ। चुनाव नजिकिँदै जाँदा महोत्तरी–४ मा राजनीतिक गतिविधि तीव्र बन्दै गएको छ भने विभिन्न दलका उम्मेदवारहरू जनताको घरदैलोमा पुगेर मत माग्ने क्रम बढिरहेको छ।