गौशाला १२ को वडा अध्यक्षमा ललित सिंहको स्वतन्त्र उम्मेदवारी

3 वर्ष पहिले प्रकाशित

(2079-01-10 B.S.)

11517 पटक देखिएको

गौशाला

गौशाला नगरपालिका वडा नं.१२ को वडा अध्यक्षमा ललित कुमार सिंहले स्वतन्त्र उम्मेदवारी घोषणा गरेका छन । माओवादी पार्टीबाट बिद्रोह गरेर सिंहले स्वतन्त्र उम्मेदवारी घोषणा गरेका हुन ।

शनिबार कान्तिबजारमा माओवादीका असन्तुष्ट कार्यकर्ताहरुको भेलाले सिंहलाई उम्मेदवार बनाएको हो । "दल होइन व्यक्ति खोजौ, पार्टी होइन स्वतन्त्र रोजौ " नाराका साथ सिंहले उम्मेदवारी घोषणा गरेका हुन । राजनीतिमा एकै व्यक्ति, एउटै परिवारको सिण्डिकेटका कारण नयाँ अनुहार अवसरबाट बञ्चित भएका कारण स्वतन्त्र उम्मेदवारीको घोषणा गरेको सिंहले बताए ।

माओवादीको आधारशिला मानिएको कान्तिबार आसपासका कार्यकर्ताहरुले नेतृत्व प्रति असन्तुष्टि जनाएर पार्टीबाट बिद्रोह गरेका छन । नेतृत्वको क्रियाकलापबाट असन्तुष्ट कार्यकर्ताहरुको समर्थनमा सिंहले उम्मेदवारी घोषणा गरेको हो । सिंहलाई माओवादी केन्द्रका नगर कमिटि सदस्य र वडा कमिटि सदस्यहरुले समेत आफुलाई समर्थन गरेको सिंहले बताए ।

नेपाली कांग्रेस, माओवादी केन्द्र र अन्य दलका कार्यकर्ताले आफुलाई साझा उम्मेदवारको रुपमा समर्थन गरेको सिंहले दावी गरे । वडा अध्यक्षमा निर्वाचित भएपछि स्वास्थ्य, शिक्षा, सडक, सिचाइ, सुशासन, स्वरोजगारको अवसर, समाजिक सुरक्षा भता सहज रुपमा उपलब्ध गराउन आंगन आंगनमा वडाको सेवाको आवधारणा लागु गर्ने सिंहले बताए ।

सामान्य विरामी पनि उपचारका लागि बाहिर जानुपर्ने बाध्यता हटाउन वडामा इर्मेजेन्सी सेवा, वडाका ३ वटै विद्यालयमा आवासिय र अंग्रेजी माध्यमबाट पढाइ गराउने उनले घोषणा गरेका छन् ।