युवा नेतृत्व आजको आवश्यकता : नगर प्रमुख उम्मेदवार डा.यादव

4 वर्ष पहिले प्रकाशित

(2079-01-14 B.S.)

8625 पटक देखिएको

निरन्जन साह

महोत्तरीको बलवा नगरपालिकामा जनता समाजवादी पार्टीबाट युवा नेता डा.धिरेन्द्र यादवले नगरप्रमुखको उम्मेदवारी दिएका छन् । महोत्तरीको मध्य भागमा पर्ने बलवा नगरपालिकामा बिकास एउटा चुनौतीको रुपमा रहेको यादवले बताएका छन् ।

खासगरी नगरपालिकामा बाढी, पहिरो तथा वर्षायाममा पानी जम्ने विकट समस्या रहेकोले त्यसको निराकरण गर्ने हेतुले र जनसमुदायको अपेक्षा अनुसारको विकास गर्ने उद्देश्यले आफुले उम्मेदवारी दिएको उनले जिकिर गरेका छन् ।

बेमौसमी वर्षाको कारणले कृषि क्षेत्रमा हानि पुगेको र त्यसबाट किसानहरु बढी मर्कामा पर्ने भएकोले त्यसबाट जोगिनको लागि तटबन्धको व्यवस्था , प्रकोप न्यूनीकरणका उपाय अपनाउन पहल गर्ने बताएका छन् । स्थानीय सरकारले हालसम्म दीर्घकालीन योजना निर्माण गर्न नसकेको बताउँदै उनले अब युवा नेतृत्वले मात्र यस्तो दिगो विकासमा जोड दिन सक्ने बताएका छन् ।त्यस्तै उनले ठूलो इतिहास बोकेको बलवा बजारप्रति स्थानीय सरकारले कुनै चासो राख्न नसकेको बताएका छन् ।

उनले भने," बलवा बजार मात्र नभएर यहाँको पडौल स्थान , यहाँको कच्ची सडक, बाटोघाटो लगायत यस्ता विभिन्न क्षेत्र छन् जसलाई व्यवस्थित गर्नु एकदमै जरुरी देखिएको छ । पडौल स्थान जस्तो पवित्र स्थलमा फोहोरमैला थुपारिएको छ । विगतका जनप्रतिनिधिलाई यो कुकर्मको पाप लाग्नेछ । जसले यसप्रति अलिकति पनि चासो दिन सकेनन् । तर अबको चुनाव पछि यी सबै समस्या समाधान हुनेछन् ।"

उनले अबको चुनावमा जनसमुदायले आफ्नो बहुमुल्य मत दिएर जिताएमा कृषि पेशामा संलग्न किसानहरूको लागि विभिन्न योजनाको निर्माण गरी सिचाइ, मल, बीउ आदिको आपूर्ति गरी बजारीकरणको अवस्था सिर्जना गर्ने बताएका छन् ।

उनले भने," यहाँ शिक्षा, स्वास्थ्य, आर्थिक तथा सामाजिक क्षेत्रमा पनि विकासको कमी छ । सोचेअनुरुप आजसम्म कुनै जनप्रतिनिधिले कार्य गर्न सकेनन् । तर अबको चुनावपछि बलवा नगरपालिकाका बासिन्दालाई सडक, खानेपानी, शिक्षा, स्वास्थ्य, बजार व्यवस्थापन लगायत कुनै कुराको म कमि हुन दिनेछैन ।दिगो विकासलाई मध्यनजर गरी म यहाँको जरादेखि नै विकास गर्नेछु र बलवा नगरपालिकालाई उत्कृष्ट नगरपालिकामा परिणत गर्ने छु । मलाई केवल जनताको साथ चाहियो । जनताको साथ नभए मैले केही गर्न सक्दिन ।"