निरन्जन साह 

नेकपा एमाले पार्टीका बर्दिबास नगरपालिकाका नगर प्रमुख प्रत्यासी टेक बहादुर बलम्पाकीले आजको प्रतिबद्धता चुनावपछी लागु हुने बताएका छन् । रेडियो जुनतारा १०३.४ मेगाहर्ज बाट प्रसारित कार्यक्रम जनआवाजमा आफ्नो अन्तर्वार्ता दिदै उनले यस्तो बताएका हुन् ।

बर्दिबासमा परिवर्तनको आवश्यकता औल्याउदै उनले भने ,”अहिलेको राजनीति अवस्था ,भ्रष्टाचार स्थानीय तहमा देखेर जनता रुष्ट भएका छन् । जनताको चाहे अनुरुपको विकास कसैले गर्न सकेका छैनन उम्मेदवारहरुले चुनाव जित्न जनतालाई धेरै आश्वासन दिने गरेका छन् तर त्यसको पूर्ति सुन्य हुन्छ । आश्वासन अनुसार काम गर्न नसकेकाले जनता रुष्ट छन् । तसर्थ यसको विकल्प एमाले हो भन्ने जनतालाई थाहा छ ।

बर्दिबास नगरपालिका विकासोन्मुख नगरपालिका भन्दै उनले यहाँ जुन गतिमा विकास निमार्णको काम हुनुपर्ने थियो त्यो हुन नसकेको बताएका छन् ।उनले भने, बर्दिबास नगरपालिकालाई नयाँ स्वरूप दिनुपर्छ भनेर म अगाडि आएको हुँ । यसलाई नगर हुँदै महानगर बनाउनुपर्छ भन्ने योजनाका साथ हामी अगाडि आएका छौं । घोषणामार्फत हामीले बर्दिबासलाई सफा, सुन्दर र व्यवस्थित बनाउने योजना अगाडि सारेका छौं । यहाँ मुख्य यातायात व्यवस्थापन, सडकमा पार्किङको समस्या, ढलको समस्या छन् । सडकहरूमा पनि त्यस्तै समस्या देखिएका छन् ।  व्यवस्थित शहर बनाउनका लागि ती समस्या समाधान गर्नुपर्ने छ, हामी त्यसमा लाग्ने छौं । १४ वटा वडा रहेको नगरपालिकामा नागरिकका आधारभूत आवश्यकता पनि पूरा गर्न सकेका छैनौं, त्यसलाई पनि हामी पूरा गर्छौं ।

जनताहरू अझै पनि स्वच्छ खानेपानी, शिक्षा, स्वस्थ्य, रोजगारी लगायतका आधारभूत सेवाबाट वञ्चित छन्, त्यसलाई कसरी पूरा गर्दै लैजाने भन्ने कुराको योजना लिएर अगाडि बढेको उनले बताएका छन् । बर्दिबासमा  अव्यवस्थित बसोवासको धेरै ठूलो समस्या छ, त्यसलाई मुख्य एजेण्डा बनाएर जान्छौं । उनले भने पाँच वर्षअगाडि र अहिलेको अवस्था धेरै फरक छ । हिजो के थियो भन्ने नहेरौं अहिले के छ भनेर हेर्नुपर्छ । परिस्थिति परिवर्तन भएको छ । पार्टीको गतिले गर्दा पनि मानिसहरूले एमालेलाई विश्वास गरेका छन् । एमाले पार्टीलेले विजय प्राप्त गर्छ भन्ने हाम्रो विश्वास हो स्वतन्त्र व्यक्ति अर्थात् संगठन नभएको व्यक्तिलाई जनताले विश्वास गर्ने कुरा भएन । कुनै पनि पार्टीको विकल्प स्वतन्त्र हुन सक्दैन । विकास गर्न संगठन चाहिन्छ, त्यो एमालेसँग छ ।

जनताको पक्षमा हरेक कार्य गर्न तत्पर रहेको बताउदै उनले भने ‘जनताका लागि रोटी, कपडा र मकान मुख्य कुरा हो । यसलाई सम्बोधन गर्ने उम्मेदवार नै हामीले पाएका छैनौं । पैसाको बलमा चुनाव लड्ने र मतदातालाई प्रभावित गरेर नजिता आफ्नो पक्षमा पार्ने प्रयास भइरहेको छ । यसले सही नेतृत्व ल्याउँदैन ।’तसर्थ अब नेकपा एमाले पार्टीले नै यहाको विकास सुनिश्चित गर्न सक्छ ।

त्यस्तै उनले समग्र नगरवासीलाई एमाले पार्टीलाई साथ दिन आग्रह गर्दै दिगो विकासको नगर प्रमुखमा आफुलाई एकपटक मौका दिन जनसमुदायमा अनुरोध गरेका छन् ।