प्रहरी समायोजनको लागि सरकारले गम्भीरता नदेखाएपछी मधेश सरकारद्वारा आन्दोलनको घोषणा

4 वर्ष पहिले प्रकाशित

(2079-04-28 B.S.)

2973 पटक देखिएको

साउन, २८

प्रधानमन्त्री शेरबहादुर देउवालाई प्रहरी समायोजनका लागि ७ दिने अल्टिमेटम सहित बुझाएको ध्यानाकर्षण पत्रको एक साता वितिसक्दा पनि गम्भिरता नदेखाएको भन्दै मधेस सरकारले आन्दोलनको घोषणा गरेको छ ।

संघीय सरकारले प्रहरी समायोजनका लागि बेवास्ता देखाएको आरोप लगाउँदै मधेस प्रदेश सरकारले पहिलो चरणको आन्दोलनको घोषणा गरेका छन् । शनिबार मधेस प्रदेश सरकारका गृह तथा सञ्चारमन्त्री भरतप्रसाद साहले औपचारिकरुपमा आन्दोलनका कार्यक्रम सार्वजनिक गरेका छन् ।

पहिलो चरणको आन्दोलनको कार्यक्रम अन्तर्गत मधेश प्रदेश सरकारले साउन २९ गतेदेखि बिहान ११ बजेदेखि दिउँसो १ बजेसम्म दुई घण्टा प्रदेश प्रमुखको कार्यालयमा धर्ना दिने बताए । सो दुई घण्टा धर्ना कार्यक्रम एक सातासम्म चल्ने छन् । पहिलो चरणको आन्दोलनबाट पनि संघीय सरकारले प्रहरी समायोजन लगायतका अधिकारको विषयमा गम्भिरता नदेखाए दोस्रो चरणको आन्दोलनको कार्यक्रम घोषणा गर्ने सञ्चारमन्त्री साहले बताए ।

उक्त आन्दोलनमा अन्य प्रदेश सरकार तथा सबै पक्षलाई सहयोग प्रदान गर्नका लागि समेत मन्त्री साहले आह्वान गरे । उनले नागरिक समाज, नागरिक अगुवा, बुद्धिजीवी, सञ्चारकर्मीलगायत सबैसँग समर्थनका लागि आग्रह समेत गरे । मुख्यमन्त्री लालबाबु राउतको नेतृत्वमा हुने सो धर्नामा मधेस प्रदेश सरकारका मन्त्रीहरु, प्रदेशसभा सदस्यहरु, नागरिक समाजका अगुवा लगायतका व्यक्तिहरुको सहभागिता रहने मन्त्री साहले बताए ।

यस अघि गत साउन २२ मा मधेस प्रदेश सरकारले ७ दिने अल्टिमेटम सहित प्रदेश प्रमुख मार्फत प्रहरी समायोजनका लागि प्रधानमन्त्री देउवालाई ध्यानाकर्षण पत्र बुझाएको थियो ।