जनमत पार्टीका सबैभन्दा कान्छा उम्मेदवार महतो घरदैलो अभियानमा

7 महीना पहिले प्रकाशित

(2082-10-26 B.S.)

584 पटक देखिएको

महोत्तरी,माघ २६ गते ।

जनमत पार्टीका सबैभन्दा कान्छा उम्मेदवार बिरेन्द्र महतोले गौशाला नगरपालिका वडा नं. १२ मा घरदैलो अभियान तीव्र पारेका छन्। जनतासँग प्रत्यक्ष भेटघाट गर्दै उनले आशिर्वाद र समर्थन मागिरहेका छन्।
घरदैलोका क्रममा उम्मेदवार महतोले देशमा अब पुरानो शैलीको राजनीति होइन, युवा पुस्ताको नेतृत्व र सुशासन आवश्यक भएको बताएका छन्। उनले भने, “देशमा पटक–पटक पुराना अनुहारलाई जिताइयो, तर जनताको अवस्था जस्ताको तस्तै रह्यो। विकास, रोजगारी, शिक्षा र स्वास्थ्यमा ठोस परिवर्तन हुन सकेन।”
उनले भदौ २३ र २४ गते भएको आन्दोलनलाई स्मरण गर्दै त्यो आन्दोलन देश परिवर्तनको आवाज भएको बताए। “त्यो आन्दोलन कुनै व्यक्ति वा दलका लागि होइन, समग्र देश परिवर्तनका लागि थियो,” उनले भने।
महतोले अबको सरकार जेन्–जी (Gen Z) पुस्ताको सरकार बन्नुपर्ने धारणा राख्दै युवाहरूले नै देशलाई सही दिशामा लैजान सक्ने विश्वास व्यक्त गरे। उनले जनताको सेवा, सुविधा, रोजगारीको सुनिश्चितता, गुणस्तरीय शिक्षा र सहज स्वास्थ्य सेवाको ग्यारेन्टी दिनकै लागि आफू राजनीतिमा आएको स्पष्ट पारे।
घरदैलो अभियानमा स्थानीय बासिन्दाहरूले युवाको उम्मेदवारीलाई आशाका रूपमा हेरेको प्रतिक्रिया दिएका छन्। केही मतदाताले नयाँ सोच, नयाँ ऊर्जा र इमानदार नेतृत्व आवश्यक भएको बताउँदै युवालाई अवसर दिनुपर्ने धारणा राखेका छन्।
जनमत पार्टीका उम्मेदवार महतोले अन्त्यमा भने, “अब परिवर्तनको समय आएको छ। यो परिवर्तन जनताबाटै सम्भव छ, र म जनताको साथ र आशिर्वाद लिएर अघि बढ्न चाहन्छु।”